Tylor Robinson ku riesgo di keda kondená na kastigu di morto.
PROVO, Merka (AFP).- E sospechoso di a asesiná e aktividat norteamerikano Charlie Kirk, a keda akusá e.o. di homisidio, segun e fiskal di Utah, Jeff Gray, kende lo buska kastigu di morto si haña e sospechoso kulpabel. Kirk, di 31 aña i un aliado di presidente Donald Trump, a muri dia 10 di sèptèmber durante un evento na Utah University. E tabata fundadó dje grupo polítiko hubenil konservador Turning Point USA.
Segun outoridatnan, Tyler Robinson (22) a usa un rifel ku mira teleskop pa for di distansia a mata Kirk ku un tiru na garganta. El a keda arestá 33 ora despues. Gray a bisa di ta konsiderá e pruebanan akumulá pa investigadónan komo sufisiente pa akusashon di homisidio bou situashon hopi grave. “Un situashon serio, di kua e tabata sa ku intenshonalmente lo e kousa morto di Charlie Kirk i ku riesgo grandi di por a mata mas hende”, segun el a agregá.
En total lo tin shete akusashon kontra di Robinson, segun Gray a bisa den konferensia di prensa den kua el a antisipá di lo buska kastigu di morto. “Lo mi presentá un notifikashon buskando kastigu di morto. “Mi no a tuma e desishon ei asina lihé. “Ta un desishon ku mi a tuma di forma independiente komo fiskal dje kondado, basá riba pruebanan disponibel i e sirkunstansianan i naturalesa dje krímen”, el a agregá.
Kirk, kasá i tata di dos yu, tabata usa TikTok, Instagaram i YouTube pa ekspresá su puntonan di bista konservador, inkluso krítikanan fuerte kontra e movementu pa derechinan transgénero.
E direktor di FBI, Kash Patel, severamente kritiká relashon ku e krímen aki, inkluso a anunsiá muchu lihé e kaptura di otro sospechoso ku a keda liberá dos ora despues.
White House a bisa djadumingu ku lo e persiguí un supuesto “movementu terorista doméstiko” di iskierda tras di asesinato dje ‘influender’, loke a lanta preokupashon ku por usa esaki pa silensiá opositornan polítiko.
