WILLEMSTAD.- E asesino di Lennard Gwensley Frederick a bisa “mi ta tir’é mata i mi no ta bai será”. Un asesinato kruel, sanger friu i ku a shòk komunidat. EXTRA a papia ku Raymond Abad propietario di e trùk di pan na Palu Blanku. Ku palabranan difísil saliendo for di su boka i konmové ainda pa e asesinato aki, el a konta nos kon kos a bai e dia en kuestion.
Segun Raymond, e asesino i Gordo/Len tabata amigu di otro. Ta bon kliente na e trùk aki i ta hende ku sa para warda Len kaba di traha pa nan dos bai kue un kaya.
E dia en kuestion e ku Len tabata hasi basta wega. E sospechoso tabata pará na trùk ku un otro hòmber ku el a bin kuné den outo (e shofùr). Nan a pidi nan kuminda. A saka e kuminda di e otro gai promé i despues di e sospechoso. E hasimentu di wega miéntras tantu a sigui, segun Raymond.
Raymond a bisa Len dado momentu ku e gai ei ta mustra fuma. E gai/sospechoso a bisa Gordo ku e ta dal e wanta i Gordo no por hasié nada. Asta el a pidi Raymond pa e drenta den e trùk i Raymond a bisé ku den trùk di pan no ta lugá di hasi wega pero ta lugá di rèspèt.
E kumindanan a keda kla i nan a tuma nan kuminda. E sospechoso a bisa ku e no ke kuminda mas i e otro gai a bisé pe tuma su kuminda. E sospechoso a pusha e kuminda riba ‘toonbank’ pero despues a tum’é tòg, i drech’é. E otro gai ku tabata shofùr di e outo a bai sinta den outo i mientrastantu Len a bin para pafó i e sospechoso a push’é den su kara i bisé ku e no por hasi nada.
“El a bisa mi ku ora trùk sera no laga Len bai kas pasó e lo tir’é. Mi a bisé bo ta papia kuent’i tira, bo ta kla pa sinta kastigu? El a bisa mi ku e ta tira Len i no ta bai sera” Raymond a sigui konta EXTRA.
Despues di esei el a drenta outo i bai. A yega un kliente i Raymond a pidi Len pa bai drecha kuminda pa e kliente. No a dura ni 10 minüt ku e sospechoso i su amigu a bai ku Raymond a mira un hende kara tapá ta kore bin for di direkshon di Marchena. Raymond a grita Len pa e kuida. E sospechoso na su turno a grita nan pa hala i el a lòs vários tiru. Segun Raymond ta tres tiru pero e otro kolega para pafó a tende zonido di 4 tiru.
Despues el a kore bai mesun direkshon i Raymond a bai su tras. Pero e mester a bira bèk pasó e otro kolega a grit’é ku bala a kue Len. El a yega den e trùk i Len a bisé “Mac yuda mi”.
Ta un akto kruel i hopi tristu pasobra Len ta un gai asina trankil ku no ta gusta problema, asina Raymond a bisa EXTRA ku un tristesa.
Raymond a rekonosé e sospechoso komo e amigu/sospechoso di Len ku djis 10 minüt promé tabata na trùk i ku a asta bisa di lo tira Len.
For di e dia ei e trùk a keda será i lo keda será te na 8 dia despues di entiero di Lennard. Entiero ta djasabra awor.
“Despues lo mi bin bèk mas fuerte. Lo mi bin bèk ku menú nobo i mesun servisio kustumbrá”. Raymond a bisa EXTRA ku e ke yuda e famia di Len ku a keda atras i p’esei e lo bai pidi kooperashon pa un florin riba kada kuminda i e tambe lo kita un florin di e kuminda mes, esta hasié 2 florin total pa duna e famia. Len no a meresé di muri di e forma aki. Len tin kasi 10 aña, for di mucha e ta traha den trùk di pan. I e 7 aña trahando pa Raymond mes. Len ta un ehèmpel pa hóbennan kon por traha pa yega na bo pan di kada dia.
Raymond ta spera tambe ku tur e historianan ku ta keda fantasiá den e kaso aki lo para, esaki pa memoria di Len, un hòmber ku a muri trahando desentemente. E ta pidi pa laga outoridatnan hasi nan investigashon pa e asesino paga pa a kita bida di un hóben desente, yen bida ku no ta hasi niun hende daño. Pas na su restunan.

7 COMMENTS

  1. No ta eksistí rèspèt mas pa kreashon di Dios? Yen yen di burdugu mal parí ta kana rònt riba e pida baranka aki. Asta kuando hende drechi tin ku sigui sufri? Forsa na famia.😭😭

  2. Hopi tristu
    Akto di kobardia mi ta jama e kos aki
    Bai pariba awo aya ta bals bo mester tin pe luga wak ku bo ta man
    E luga ta warda bu

    Senjor duna su famia forsa i consuelo

    R.I.P. LEN

  3. Mi ta hanja hopi tristu di lesa e kos aki. Pasobra nos no konose korsow asina ki.Mi ta bida 28 anja na hullanda pero mi tambe tin famia aja bouw . Tur anja mi ta bini korsow wak mi famia nn pero bo ta kana cu medu riba kaja nn , anochi bo ta keda den kas pa nn tira bo mata . E mama tin un dolo hopi duru mes, un jui trese na mundu asina kita for dje mundu aki, Mi tambe ta korda anja pasa december mi tabata na korsow mi ta bai e truk di pan e gai len ta trata bo cu amor kontentu.. Ora ma mirele den korant ma spanta bisa mi jui nn mi konose tur anochi mi tabata bai kumpra pan na e truk.Mi ta puntra mi mes e gai cu a matele por drumi anochi no ta siguur. Mi ta spera polis por buta un bon man riba e gai aki. Ja cu len por sosega na pas. Korsow unda nos ta bai asina ki , bo ta hanja midu bini bo lugaar mes , pas na su alma cu dios juda su famia nn. R.I.P LEN SOSEGA NA PAS

LAGA UN KOMENTARIO

Please enter your comment!
Please enter your name here