WILLEMSTAD.- Ayera durante tratamentu di e kaso di atrako di 192 mil florin na altura di PSB Bank ku a tuma lugá dia 2 di yüni último, di kual e komersiante di “Tu y Yo Lottery” a bira víktima, fiskal Hato- Willems a bisa ku un di e 5 akusadonan Limar Mongen(30), aparte di tin e akusashon di atrako i poseshon di arma di kandela, ta akusá di a agredí e hòmber E.N. malamente na e komplehonan di sèl na Barber.
Mongen a bisa ku e ta esun ku a agredí e akusado E.N. na Barber ku ta será pa violashon di menornan di edat, debí ku E.N a trata na viol’é na chikí.
El a bisa ku e no a hañ’é na chikí i awor ku e ta grandi el a agredié ora ku el a top’é na Barber.
Ayera tur 5 akusado a presentá den sala di korte.
Ministerio Públiko ta akusá e hòmbernan Rodolfo Elstak (40), Cristino Oleana (20) i Limar Mongen(30) di a kometé e akto, miéntras ku e dos akusadonan femenino, I. Oleana (22) i N. Rojer-Balentina (22) ta keda akusá komo esnan ku a fasilitá e fuga.
E hòmbernan ta será ketu bai i e akusadonan femenino a sali liber pendiente tratamentu di nan kaso.
Riba e dia ei den oranan di mainta trempan, un komersiante ku kier a bai hiba e montante di 192 mil florin banko a keda brutalmente atraká.
El a keda sorprendé pa atrakadornan ku a presentá den un vehíkulo, atrak’é i pa despues maltrat’é i finalmente bandoná e sitio.
Promé ku e atrako en kuestion, Elstak huntu ku Mongen i Oleana ta keda akusá pa atrako riba un hòmber di fam Nita, dia 30 di mei na altura di Juliana Brùg, ora ku nan a sigui e hòmber, blòki’é na altura di Fort Nassau, baha i bai riba dje kara tapá ku arma kandela i bis’é wak pa e sinta “ketu ketu” sino nan lo mat’é.
Nan a batié i kita su vehíkulo marka Hyundai I10 koló blou for di dje. Tambe nan a bai ku su dos telefònnan i 40 florin. A resultá ku e vehíkulo aki tabata esun ku e malechornan a hui bai despues di e atrako.
Mongen a konta ku e dia ei Elstak ku ta traha p’e den kunuku a pidié pa e bai Skalo kuné pa wak un peki venezolano pa tene relashon. Segun Mongen , debí ku Elstak ta un adikto na droga e no ta haña un muhé fásil pa hasi sèks kuné.
Ora ku nan tabata den Skalo, un hòmber a para nan i a puntra Mongen si e ta hasi sèks oral.
Segun Mongen debí ku den pasado el a hañ’é hopi ku tipo di situashonnan asina, el a haña un rabia den su kurpa i a bisa e hòmber si.
E hòmber a bisa nan pa kore su tras. Ora ku nan tabata kasi yega Fort Nassau, e hòmber a baha fo’i dje outo kana bin serka dje.
Ora ku e hòmber a yega serka, el a bati e hòmber mal batí pa e loke ku el a bis’é.
Mongen a bisa ku despues di esei, direpente el a mira Elstak a bai ku e outo di e víktima.
Elstak a akseptá ku el a bai ku e outo i a duna un Chamo venezolano left na kaminda. Oleana si a ninga redondamente ku e tabata den e outo ku a keda hòrtá. El a bisa ku e tabata ku Mongen den pikòp, pero a baha na pia bai laga nan ora di bringamentu.
Elstak ta keda akusá tambe pa atrako riba algun turista na Cas Abou dia 31 di mei último. El a menasanan i obligá nan dun’é tur nan pertenensianan entre nan 100 florin, telefònnan i tambe nan vehíkulo.
Mongen, Elstak i Oleana ta keda akusá tambe pa poseshon di arma di kandela. E kaso a keda posponé pa dia 4 novèmber binidero.

LAGA UN KOMENTARIO

Please enter your comment!
Please enter your name here