MADRID.- Spaña lo duna yudansa humanitario via di Nashonnan Uní na Cuba, pais ku ta den un krísis ekonómiko profundo ku a bira mas grave debí na e preshon di Washington, segun anunsio di Ministerio di Asuntunan Eksterior na Madrid. Cuba ta enfrentá un krísis energétiko hopi grave despues ku a stòp e suministro di petrolio di parti di Venezuela despues di kaida di Nicolas Maduro. E paramentu dje yudansa ta relashoná ku e menasanan di Washington di bini ku impuesto spesial pa paisnan ku ta bende petroli ku e isla.
Debí na e situashon aki, e gobièrnu komunista, for di djaluna, a introdusí un pakete di medidanan di emergensia ku ta limitá e benta di kombustibel i a redusí e transporte públiko, un aktividat ku ya a sufri hopi bou dje krísis ekonómiko, ademas di ‘black-out’ i eskases di kuminda i remedi.
“E situashon aktual na Cuba a keda tratá den un reunion entre e minister spañó Jose Manuel Albares i e kansiyer kubano, Bruno Rodriguez, segun ta bisa den un komunikado, pero sin duda mas detaye.
Den e enkuentro “a asentuá e boluntat pa reforsá e diálogo polítiko, ekonómiko-komersial i e kooperashon den benefisio di tur dos pais den e situashon kompliká aktual, teniendo kuenta ku situashon di pas, seguridat i derechi internashonal i e agreshon kresiente di Merka kontra di Cuba”, segun Rodriguez a skirbi riba X. E kansier kubano a hasi un eskala kòrtiku na Madrid despues di a bishitá China i Vietnam.
