MADRID, SPAÑA, AFP.- Un akuerdo firmá ku UE lo duna Spaña 15 miar euro, i e pais lo invertí esaki den transformashon digital di Spaña.
“E plan ta konforme ophetivonan di Union Europeo” segun Promé Minister Pedro Sanchez a bisa despues ku el a presentá e proyekto djaweps.
E fondo lo finansiá e ret 5G, lo ekstendé kobertura di internèt den áreanan rural i lo fasilitá edukashon digital pa e pueblo.
E gobièrnu ta pronostiká ku lo invertí un total di 70 miar euro den e agènda digital entre 2020 i 2022.
Sektor privá lo kontribuí ku 50 miar euro i e sobrá lo bini di e sektor públiko, kual ta inkluí 15 miar euro di e plan di reskate aprobá na Bruselas e siman aki, segun indikashon di gobièrnu den un komunikado.
Spaña lo haña 140 miar euro di kual solamente 73 miar ta supsidio i e sobrá ta krédito, segun fuentenan ofisial.
