MADRID, AP.- Bintidos minister a huramentá djaluna pa firma e gobièrnu nobo di Spaña. Esaki ta e promé koalishon den kuater dékada desde ku a establesé demokrasia.
Ainda tin duda tokante si e gobièrnu di e dos partidonan iskierdista lo terminá nan periodo di kuater aña komo un gobièrnu minoria. Aparte di esaki e gobièrnu ta enfrentá un serie di tema problemátiko ku por provoká tenshon den e koalishon.
E presidente Pedro Sanchez tin e tarea kompliká di mantené sosten di su sosio di koalishon, Pablo Iglesias, e lider di e partido antiousteridat Unidas Podemos. “Si un intento pa forma un gobièrnu di koalishon bolbe frakasá, esaki lo daña kredibilidat di Unidas Podemos”.
Sanchez a logra forma gobièrnu ku dos vota siman pasa. El a logra esaki dor ku 13 miembro di e partido katalan ERC a apstené di vota.
Ainda Spaña ta un di e ekonomianan mas saludabel di Europa ku un kresementu di mas o ménos 2% den 2019.
E problema prinsipal di gobièrnu ta pa aprobá un presupuesto ku ta satisfasé Union Europeo. Aparte di esaki e gobièrnu mester kumpli ku algun promesa sosial, kual ta varia desde oumento di penshun te na oumento di salario di funshonarionan públiko i salario mínimo.
