MADRID, SPAÑA, AFP.- Spaña a registrá un rèkòrt di kasonan diario di COVID-19 for di komienso di e pandemia ku kasi 39.000 infekshon for di djamars, segun indikashon di e ministerio di salú djárason.
E ministerio a indiká ku a registrá 38.869 kaso nobo konfirmá den e último 24 oranan, kual ta subi e total for di inisio di e pandemia na 2,176 mion.
Outoridat a reportá 195 morto den e último 24 oranan, sumando e kantidat total na 52.878 morto den Spaña.
E datonan ta “pone nos den un riesgo ekstremadamente haltu” den e pais kompleto segun e minister di Polítika Teritorial i Funshon Públiko Carolina Darias den un rueda di prensa. “Preshon riba hospitalnan ta sigui subi” i aktualmente 27% di kamanan den kuido intensivo ta okupá pa pashèntnan ku Corona vírus.
E minister a agregá ku a subi e kantidat di tèstnan realisá pa detektá e vírus despues di fiestanan di Pasku.
E oumento di e kantidat di kasonan a subi despues ku gobièrnu a suavisá medidanan pa permití tur hende pa pasa dianan di fiesta ku nan famia, miéntras e pais ta sigui ku su kampaña di vakunashon.
