BARCELONA, AP.- E gobièrnu spañó a bisa djárason ku lo hasi tur kos posibel pa para violensia na Catalonia, kaminda e konfrontashonnan entre esnan pro independensia i polis a laga mas di 200 herido den dos dia.
“E gobièrnu lo aktua”, segun un komunikado emití pa Madrid. E dokumento a agregá ku presidente Pedro Sanchez lo reuní ku otro lidernan polítiko nashonal i ku lo “no deskartá ningun senario”.
Esnan pro independensia kier pa Catalonia separá di Spaña i kombertí den un pais europeo. E kapital Barcelona i otro lokalidatnan katalan a registrá vários konfrontashon despues ku tribunal Supremo di Spaña a kondena nuebe lider pro independensia na vários aña di prizòn, pa esakinan su partisipashon den un intento di separashon den òktober 2017. E disturbionan a kuminsá djamars atardi, na momentu ku polis di Barcelona a informá ku 40.000 manifestante a yena kayanan alrededor di ofisina di e gobièrnu spañó.
“E situashon ta hopi difísil, pero polis tin tur medio nesesario pa lidia kuné”, asina direktor di polis regional katalan, Pere Ferrer a bisa den un konferensia di prensa.
Un organisashon ku ta representá negoshinan den e sentro kapital katalan, Barcelona Abierta, a señalá ku e aktonan di violensia a kousa “pèrdidanan konsiderabel” i a “daña” e imágen di e destino turístiko popular den ekstranhero.
