PEDRO SACHEZ; presidente di Spaña
MADRID (AFP).- Gobièrnu spañó a mantené su mes firme i a nenga di tur manera kualke intenshon pa kolaborá militarmente ku Washington, despues ku White House a anunsiá un kambio di posishon di Spaña. “Nos posishon ta sigui apsolutamente sin kambio”, segun e Minister di Asuntunan Eksterior dje pais, José Manuel Albares. El a ripití ku Spaña lo no permití pa usa nan basenan militar pa ataká Iran.
Ku esaki Albares a reakshoná riba e loke bosero di White Huse, Karoline Leavitt, a trese dilanti, esta ku “den último oranan Spaña a akordá pa kooperá ku ehérsito norteamerikano”. “Nos posishon riba uso dje basenan militar pa e guera den Medio Oriente no a kambia”, segun Albares. E presidente sosialista spañó, Pedro Sanchez, tabata kategoria: “Nò na guera”.
Sanchez mas aleu a bisa “nos lo no ta kómplise di algu ku ta malu pa mundu i ku tambe ta kontrario na nos balornan i interesnan, simplemente pa miedu di represaya”.
Djamars, for di White House, Trump a reakshoná iritá pa motibu dje desishon di Spaña pa no permití uso di e basenan di Rota i Morón, den zùit dje pais, akusando Spaña di ta komportá su mes komo un “teribel aliado” i a menasá ku suspenshon di komèrsio entre e dos paisnan. E enfrentamentu aki entre Sanchez i Merka ta keda agregá na e negativa spañó di gasta 5% di su PIB den defensa, manera Trump a reklamá serka tur e aliadonan di OTAN.
