WILLEMSTAD.- Ayera nochi den ‘Louie Louie Talks’, sra. Lizette Sambo-Velder, direktor di sektor di Kultura i Deporte a indiká ku nan tin idea na granèl pa loke ta trata e temporada di fin di aña, pero a para ketu pa evaluá kiko ta responsabel.

Pa por trese e ambiente di fin di aña i tene na kuenta ku esaki ta ‘covid proof’ a graba resientemente mayoria grupo di tambú, esaki ku e plan pa manda e material pa radio, televishon i usa riba medionan sosial.

Trein di ambiente

Tin e idea pa bini ku un ‘Trein di ambiente’ ku lo pasa den barionan riba un velosidat abou i riba kua lo tin presentashon di grupo di tambú, artistanan solista i hasta komediantenan lo por presentá. Lo hasi uso di un treiler di karnaval i ku e plan aki duna e pueblo e chèns di por mira i disfrutá dje presentashon di nos artistanan lokal.

E plan aki ta pendiente pa keda presentá na e tim di krísis pa por risibí nan aprobashon.

Sperando Tiru

Sektor di Kultura tin plania pa produsí un aktividat ku lo keda televisá. Lo e ta un programa ku sigur lo kai na agrado di pueblo di Kòrsou kaminda lo presentá e tema: ‘Mi Pais mi kompromiso’.

Lizette a splika ku apesar di kuantu doló nos tin, nos mester por tene na otro i lanta bèk, motivá pa sigui bai dilanti. ‘Importante ta pa nos usa nos kreatividat pa nos lanta bèk. Stimulá nos hendenan pa nan duna tur di nan parti pa nos progresá.

Pues lo e bira un show televisá pa esaki bai den kadena ku tur planta di televishon i radio. E tim di produkshon ta trahando duru riba dje, nan sa ke tempu ta shòrt, pero ke brinda e pueblo un vibrashon positivo. Ku speransa nobo i fe ku nos por saka e pais aki dilanti’, asina Lizette a indiká durante dje entrevista den ‘Louie Louie Talks’.

LAGA UN KOMENTARIO

Please enter your comment!
Please enter your name here