Awor ku a suavisá moratorio
WILLEMSTAD.- Na promé lugá mester sòru ku ta duna kurso di kapasitashon na forsa laboral lokal pa yena vakaturanan den sektornan turístiko i di konstrukshon. Si ainda no tin sufisiente trahadó kapasitá mester buska yunan di tera bibá den eksterior pa bin kas bèk i traha. Asina presidente di sentral sindikal SSK, Wendell Muelen ta deklará pa EXTRA.
E ta reakshoná riba desishon di gobièrnu pa suavisá e moratorio riba diferente profeshon loke ta hasi mas fásil pa trese trahadó estranhero pa traha prinsipalmente den sektor turístiko i di konstrukshon. SSK e siman aki a reuní riba e tópiko aki den su direktiva.
No a konsulta ku e sentral sindikal promé ku a yega na e desishon aki. Muelen ta bisa ku ta den prensa el a tuma nota di e plannan di gobièrnu. E ta sinembargo un tópiko ku SSK a papia na algun okashon kaba riba dje ku e asosashon di komèrsio i industria, VBC. Den e reunionnan aki VBC na diferente okashon a trese e problemátika di skarsedat di trahadó dilanti.
SSK ta di opinion ku ainda tin un desempleo di 7,8 porshento, segun gobièrnu ta bisa, i ku mester keda eksplorá posibilidatnan pa duna e personanan aki tambe e formashon pa yena e vakaturanan ku tin. Na opinion di SSK e sektor ekonómiko sa ku tin invershonista ku ta bini ku desaroyo a base di un vishon ku nan tin. Ta den e kuadro aki e sentral sindikal ta haña ku no por warda te ora ku e proyektonan ta kla ku ta señalá ku tin skarsedat di trahadó.
Meskos ku tin un vishon riba invershonnan ku ta hasi mester prepará adelantá tambe e rekurso humano disponibel pa yena e vakaturanan ku ta bai habri. Den kaso ku ainda falta trahadó, SSK ta kere ku mester trese yunan di tera den eksterior bèk kas pa yena e vakaturanan.
Bini ku insentivonan manera paga alohamentu pa e personanan aki bin traha na Kòrsou. En todo kaso e sentral sindikal ta haña ku mester hasi tur kos pa evitá ku, a base di e suavisashon di moratorio, doñonan di trabou ta bai importá forsa laboral barata (“cheap labour”) pa loko. Esaki lo pone un preshon enorme riba suèldu mínimo na Kòrsou.
Muelen ta splika: “Si trese trahadónan for di por ehèmpel Patagonia kaminda ta traha por ehèmpel pa un suèldu di 120 dòler merikano pa luna. Ora e trahadónan aki yega Kòrsou nan ta sinti nan mes privilegiá pa traha e e suèltu mínimo di Kòrsou. Nan ta traha 10, 12 ora pa dia mes i asina doñonan di trabou ta sigui buska mas i mas di e trahadónan aki i hendenan lokal no ta haña oportunidat pa trabou.
E trahadónan lokal ku ta traha ta keda gana pa periodonan largu e mesun suèldu mínimo ku lo no oumentá pasobra tin forsa laboral barata presente ku ke traha pa e suèldu ei. Mas aleu e trahadónan estranhero aki lo drenta poko poko pero sigur tambe den e sirkuito gris di trabou buskando trabounan adishonal kaminda nan no ta duna kontribushon na fondonan sosial i impuesto. Muelen ta sigui bisa. “Ku e sistema di ‘0-uren kontrakt’ ku konosé na Kòrsou ta pió ainda pa e trahadónan aki resultá den e sirkuito gris.”
Pa e motibu aki SSK ta urgi pa gobièrnu hiba kontròlnan severo ora ku t;asina leu ku ta trese trahadónan estranhero. Segun Muelen ta mihó duna yunan di tera den eksterior oportunidat pa bini kas bèk, traha i pa ora nan bira grandi nan mes benefisiá di leinan sosial di pais ku nan a duna un kontribushon na dje, asta si nan bai biba den eksterior atrobe. Asina ta evitá ku Banko di Seguro Sosial den futuro tin ku manda sèn pa paisnan estranhero kaminda no tin yunan di tera ta biba.
SSK ta pendiente un reunion di sera konosí ku minister enkargá ku asuntunan di labor i pa inisiá atrobe ku reunionnan tripartit. Den e plataforma aki SSK sin duda lo pone e tópiko aki riba mesa pa diskutí riba dje, Muelen ta finalisá bisando.
Foto:
…Wendell Muelen…
