PHILIPSBURG.- St. Maarten ta bou di un tropical storm watch, for djadumingu 11 ougùstùs 5’or di atardi. Tin un área di preshon abou kompañá ku mal tempu ku ta duna indikashon di lo sigui desaroyá. E sistema ta 900 mia ost di e islanan Antiano mas chikí den Karibe (“Lesser Antilles”).
Segun servisio meteorológiko di St. Maarten tin chèns grandi ku e área di preshon abou por bira un depreshon òf tormenta tropikal den próksimo 48 ora. Ta konsiderá e chèns grandi ku e sistema ta pasa den e área di Islanan Ariba.
Den un diskurso nashonal promé minister demishonario, Luc Mercelina a pidi tur siudadano pa tene kuenta ku St. Maarten por sinti efektonan di e sistema for di djaluna 12 ougùstùs den oranan di anochi. E efektonan aki ta enserá yobida fuerte ku por akumulá te mas ku 15 centimeter di awa huntu ku bos ku welek ku por afektá e region te ku djárason 14 ougùstùs.
Inundashon di áreanan ku ta keda mas abou ta posibel segun ku e sistema ta pasa. Tambe mester tene kuenta ku kondishonnan di laman ta deteriorá.
Djaluna den oranan di anochi por eksperensiá ráfaganan fuerte di bientu. Den e kuadro aki Mercelina a hasi un apelashon riba tur partido polítiko pa asumí nan responsabilidat i kita tur bòrchi di kampaña i otro material di propaganda for di kamindanan públiko.
Tambe ta pidi komersio pa nan tambe kita tur nan material di propaganda riba riba kaya. Esakinan ta pa sigurá seguridat di pueblo.
Tambe gobièrnu di St. Maarten a tuma desishon pa tene tur skol será entrante djaluna 12 ougùstùs te ku próksimo aviso. Gobièrnu di St. Maarten lo sigui den konsulta ku servisio meteorológiko pa monitor e situashon i tene pueblo informá.
