WILLEMSTAD.- Stephanie Saturnino; mihó konosí komo Stacey ta un kantante di 29 aña di edat. Stacey ta nasé na Kòrsou pero e tin aproksimadamente 17 aña bibá na Hulanda. Pa mas ku 15 aña kaba Stacey Saturnino tabata ínaktivo pa loke ta trata e parti di músika. Esaki tabata pa motibunan pèrsonal.

Na aña 2002 e la hasi su promé i su último presentashon den festival di tumba hubenil Kòrsou ku un komposishon titulá; Laga e webu Herebé, ku a sali di 5 finalista.

Seguidamente Stacey a muda pa Oropa (Hulanda). Aki el a hasi algun estudio i tambe enfoká su mes riba e parti di informashon den e mundu di músika. Músika pa Stacey ta un satisfakshon di refleho riba su mes pa ku su partinan mas i ménos bon.

’’Mi ta kere den Amor’, i mi no ta imaginá mi mes ku tin algun hende na mundu ku lo no ta sinti esei. I esei ta loke mi músika ta para p’e ; Amor Personal’’.

Personalmente Stacey ta un luchadó di karakter. Anteriormente Stacey a pasa algun difikultat pa ku su salú i tambe estudio, kousando un retraso enorme pa ku su estado di salú i tambe su karera artístiko. Stacey ta un mama i tambe partner den su seno familiar. Un persona humilde i  trankil. E tin un dicho ta bisa; Si kaminda kaba, mi ta traha un kaminda.

Aktualmente Stacey ta enfoká su mes riba e parti di músika den e ramo di kantamentu. Su género di músika ta Jazz, Balada, Soul, Hip Hop, R&B i tambe músika Karibense. E siman aki e ta lansa su promé piesa ku ta hiba di título; Na’mi bo amor Señor. 

Un produkshon di Nstypash i Stacey ku ta keda lansá yanüari 2021. E produkshon di e género di gospel pa grandi i chikí. Un alabansa no pa e mundu di iglesia so, sino pa tur kas di famia tantu lokal i internashonal.

Manera ya ta konosí, mundu  ta pasando den un di e épokanan mas difísil pa kada kas di famia i pa esei konhuntamente nos mester tene e trankilidat i pas. Gosa di e produkshon.

Por haña e produkshon riba YouTube i SoundCloud bou di e nòmber di Na’mi bo amor Señor- Stacey. Sigui Stacey Saturnino via retnan sosial: Stacey.saturnino.

 

LAGA UN KOMENTARIO

Please enter your comment!
Please enter your name here