WILLEMSTAD.- Kantante Stanley Clementina ta bèk ku un kolaborashon ku ta hopi spesial na su kurason. Clementina a uni forsa ku e talentoso vokalista Qushannick ‘Qshans’ Thode ku e piesa ‘No Trata mi Asina’. Aki, un pareha ta enfrentá algun reto amoroso, unda e protagonista ta pidi su namorada pa ‘no trat’é asina’ i ku na final tur kos lo ta oké entre nan.

Apesar di e pandemia di COVID-19, Stanley Clementina no ta laga e racha di bon ambiente musikal ku e ta riba dje terminá por lo pronto. Segun Clementina, e piesa tabata hopi tempu den kashi te ora el a  haña e talento korekto pa kolaborá kuné. Mes ora ku Qshans a tende e kantika, el a gust’é i a manda su parti pa asina krea un obra magestral.

 

Qshans

E último añanan, Qshans ta trahando duru riba su karera artístiko, fihando su nòmber den e género di Ritmo Kombiná na Hulanda, unda el a militá den front di Cache Deluxe and Cache Royale. Komo solista, Qshans a saka diferente single manera ‘Gevoelens’ na 2018 i resientemente ‘Mas Mi Drai’ huntu ku Ivanhoe Willems. Banda di su karera musikal, Qshans a realisá un soño ora el a penetrá den e mundu di teatro, despues di a kompletá di estudio teatral na Music All Factory na Tilburg. Qshans a marka pouta ku su aktuashon den ‘the Lion King’ komo e suplente pa e ròl di Banzai na Hulanda. Tambe Qshans a figura den ‘Mama Mia’ komo komo Pepper i den ‘Sister Act’ komo TJ, Pablo i Eddie Fritzinger na Oberhausen, Alemania, i últimamente e obra basa riba bida di e legendario Tina Turner.

 

‘No Tratami Asina’

Un biaha mas e banda di kompa dirigí pa Clementina, CSHAW, ta kompaña riba e piesa aki, despues di nan debut ku nan single ‘Quarantaine’. ‘No Tratami Asina’ a keda skibi pa Qshans i Clementina, ken alabes a kompositá i areglá e produkto final. Produktor Sean Cannister, biba na Merka, a meks e kantika, i Darren Gardner, e talentoso direktor di Gardner Creations, a dirigí e klep.

Clementina ta trahando riba algun produkshon alentador pa fin di aña, pues sigui e página sosial di Stanley Clementina na Facebook.com/StanleyAcoustic i Instagram @stanley clementina. Un i tur por gosa di ‘No Trata mi Asina’ riba plataformanan sosial popular manera Spotify, Instagram, Facebook i Youtube.

Kòrda pidi pa ‘No Trata mi Asina’ na tur radio emisora i televishon popular riba nos islanan i bishita Clementina su página web www.stanleyclementina.com pa keda na altura di futuro aktividat.

‘No Trata mi Asina’ ta riba YouTube: https://youtu.be/j146nzKvlK4

LAGA UN KOMENTARIO

Please enter your comment!
Please enter your name here