Claymore Lanoy, direktor di Hoben Balente College.
Hóben Balente College ta organisá próksimamente dia 15 di febrüari un STEAM Day. Ta un dia ku ta pone atenshon riba e áreanan di siensia, teknologia, ingenieria, arte i matemátika atraves di diferente aktividat interaktivo i atraktivo. Direktor di e skol, Claymore Lanoy, a duna nos un splikashon di djasabra i bista di kiko tur por spera.
Pero promé ku nos a yega asina leu, nos a haña un splikashon di e nasementu di e skol sekundario akí. Claymore Lanoy ta splika ku Hóben Balente College ta kai bou di e ‘schoolbestuur’ Fundashon Ban Halsa e Standarte, ku tin diferente skol bou di dje. E skol no a kuminsá komo un skol sekundario di un dia pa otro; e trayektoria ta den su desaroyo gradual. E proseso a kuminsá ku ‘naschoolse opvang’ i despues pre-eskolar, bou di e nòmber “Muchanan Balente Pre-Eskolar.” E ‘schoolbestuur’ a sigui ku kreashon di skol di fundeshi ku e nòmber “Muchanan Balente College” i despues skol avansá “Hóben Balente College.”
Hóben Balente College tin apénas tres aña di operashon pero ya bo por mira e skol su impakto. Nan a kuminsá ku un solo klas, despues klas dos i awor nan ta operá ku tres klas na nivel sekundario. E skol tin HAVO, VWO, VSBO i AGO, ku 36 studiante repartí den tur nivel. “E skol a kuminsá ku 15 studiante i awor nos ta rumbo pa 40 studiante,” Lanoy ta splika. Kada klas ta mantené un máksimo di 20 studiante pero mayoria klas na e momentu akí tin mas o ménos 15 studiante. E resultado akadémiko di e studiante ta proba e efisiensia di nan sistema edukativo. Durante e ‘eindtoets’, e skol a logra un bon resultado i nan a risibí rekonosimentu di diferente medio di komunikashon.
Un Edukashon Diferente
Claymore a sigui riba e edukashon ku nan ta duna ei na Hóben Balente College.E skol akí ta distinguí su mes di otro skolnan di Kòrsou, dor di su sistema inovativo. E no ta pone énfasis solamente riba sistemanan tradishonal. Enbes di esaki, e ta pone énfasis riba deskubrimentu di talento. Segun Lanoy: “Nos ke deskubrí e talento di kada studiante. Nos ke duna nan e espasio pa deskubrí ki tur nan por hasi.” E skol ta traha ku un modelo ku ta pone tur studiante di diferente nivel huntu den nan promé aña. Na final di e dos aña, ta repartí e studiantenan den nan nivel di HAVO, VSBO, VWO, òf AGO. Por ehèmpel, na nivel di VSBO, e skol ta ofresé programanan den ‘zorg en welzijn’ i ‘media vormgeving’ ku ICT. Den futuro nan lo agregá un trayekto di ekonomia i empresarial.
Nivel
Na nivel di HAVO, e studiante lo skohe nan perfil akadémiko na final di e di tres aña. AGO tin un trayekto mas spesífiko ku hopi enfoke riba stazje i trabou práktiko. Den Hóben Balente College, ta hasi stazje for di promé aña. E sistema di stazje tin diferente manera, di ‘snuffelstazje’ ku ta dura mitar dia sigui pa dos dia den klas dos i un siman kompletu den klas tres pa tur e nivelnan.
STEAM Day: Un Evento inspirativo
Hóben Balente College ta prepará pa su dia habrí spesial den febrüari: “STEAM Day,” un konsepto ku ta enfoká riba Siensia, Teknologia, Ingenieria, Arte i Matemátika. E skol ta pone énfasis riba kombiná diferente área pa krea un edukashon ku no ta solamente teoria pero tambe investigashon i kreatividat.
STEAM Day lo tuma lugá dia 15 di febrüari di 10or pa 1or. Tur mayor ku ta interesá pa inskribí nan yu(nan) lo tin e oportunidat pa wak kiko e skol tin di ofresé. Ta interesante pa nota ku na e skol di fundeshi, nan ta enfoká riba resultado miéntras ku na Hóben Balente College, e atenshon lo ta riba investigashon. Por ehèmpel, na ‘Zorg en Welzijn’, nan lo pone atenshon na siensia i salubridat. Na ‘Media Vormgeving’ i ICT, nan lo demonstrá e kombinashon tékniko, arte i matemátika. Lanoy ta agregá: “STEAM ta un manera pa nos duna e mucha espasio pa deskubrí investigashon i kreatividat den nan áreanan preferí.”
Di dos aña
STEAM Day no ta algu nobo pa e skol. Aña pasá, nan tabatin un tema similar ku tabata enfoká riba kreashon. E muchanan lo ta huntu ku mayornan i nan mes lo hasi pruebanan sientífiko. Esaki ta mustra kon e skol ta trata pa inkluí henter e komunidat den nan esfuerso pa mehorá edukashon.
Fundashon Ban Halsa e Standarte: Spiritual i Emoshon
Un otro punto ku ta diferensia Hóben Balente College di otro skolnan ta e enfoke riba desaroyo emoshonal i spiritual di nan studiante. Atraves di Fundashon Ban Halsa e Standarte, e skol ta siña e studiante balornan étiko i moral den un manera ku ta enkapsulá prinsipionan bíbliko. E teksto bíbliko di Hóben Balente College ta sali for di Job ku defakto ta bisa ‘nos ke siña e hóbennan teme Dios, i hasi eskohonan ku ta sabí’.
Tur ta bon bini
Lanoy ta splika ku e fundashon ta lanta for di un iglesia pero tur studiante ta bon bini. “Nos tin un nochi di hóben djabièrnè kaminda e studiantenan ta reflehá riba nan desishonnan di bida i siña hasi desishonnan ku ta basá riba e palabranan di Dios,” e ta konta. E sistema ta traha, pasó e studiante ku ta partisipá den e programa ta mustra un desaroyo positivo, no solamente akadémiko, pero tambe den nan manera di pensa i enfrentashon di bida.
Lanoy ta menshoná ku si un studiante no ta balansá emoshonalmente, su progreso akadémiko lo ta mas abou. Esaki ta indiká e importansia di traha ku e studiante den un manera holístiko. “Nos tin studiante ku ta bini skol ku hopi frustrashon i rabia. Pero segun nos traha riba nan konfiansa i desaroyo emoshonal, nan ta habri mas i nos ta mira un kambio positivo,” Lanoy ta bisa.
Un Kolaborashon Entre Mayornan i Skol
Lanoy ta indiká ku e mayornan tin un ròl vital den e desaroyo di nan yunan. “Ora un mayor ta habrí, e desaroyo di e mucha ta bai mas lihé. Pero ora e mayor ta mas será, e progreso di e mucha ta tarda un tiki mas,” e ta bisa. Un ehèmpel ku e ta duna ta di un reunion ku mayornan, kaminda nan a hasi un eksperimento ku klei. Nan a mira un video ku un profeshonal tabata traha un skultura i despues nan mester a trata di reprodusí esaki den 5 minüt. Ora nan no por a logra e mesun resultado, nan a rekonosé ku e ora i material ku nan a haña no tabata sufisiente. Lanoy ta duna un lès profundo riba esaki: “E mesun kos ta bai pa nos hóbennan. Nos mester ofresé nan e instrumentonan i espasio nesesario pa nan logra nan potensial.”
Un lider ku ta inspirá
Lanoy, un profeshonal ku hopi aña di eksperensia den sektor finansiero, a disidí di dediká su konosementu i pasenshi pa edukashon. “Mi a hasi 50 aña i mi a disidí di traha pa un legado ku ta inspirá e generashon ku ta bini. Mi a bandoná un karera haltu pa dediká mi mes na e trabou di formá hóbennan,” e ta bisa. Den su liderato, Hóben Balente College a krese kontinuamente i su vishon pa e skol ta kla: krea un lugá kaminda studiante por deskubrí nan pashon, krese akadémikamente i desaroyá un sentido di responsabilidat i balansa emoshonal.
“Nos ta invitá pueblo di Korsou pa bishitá e dia habrí di Hóben Balente College dia 15 di febrüari próksimo, di 10or pa 1or pa por eksperensiá e skol i tuma informashon”.