Steven Martina den funshon komo minister Desaroyo Ekonómiko atrobe

WILLEMSTAD.-Un ratu pasá dr. Ivan (Steve) Martina a huramentá serka su ekselensia gobernador di Kòrsou sra. Lucille George-Wout komo minister di Desaroyo Ekonómiko den gabinete Rhuggenaath. Ta di dos bia ku Martina ta huramentá den mesun gabinete. Despues di a baha trapi di palasio di gobernador Martina a bisa ku e ta kontentu i tin hopi energia.

Segun Martina, Kòrsou ta pasando momentunan difísil i e ta kere ku e por duna un kontribushon na e proseso di rekonstrukshon di Kòrsou, krea kuponan di trabou pa saka e pais aki for di krísis i asina hiba e pueblo aki na bienestar i prosperidat pa Kòrsou.

Relashoná ku e keho ku e Fundashon Hustisia pa Un i Tur a entrega na korte, ku e meta pa obligá Ministerio Públiko pa pèrsigui Steven Martina, e minister nobo s bisa ku atraves di tempu su kueru a kurti i e ta konsiderá esaki otro zèt polítiko. Un grupo a hasi denunsia i e ta kere ku mester laga e proseso kana su kurso. Awe un kapítulo nobo a habri! Martina a sigui bisa ku el a prepará su mes mentalmente pa enfrentá e reto aki. Su prome reunion komo miembro di Konseho di Minister lo ta mayan, djasabra mainta den un reunion ekstraordinario di Konseho di Minister. Mas detaye den edishon di EXTRA.

SHARE

LEAVE A REPLY