WILLEMSTAD.- Sindikato STrAF a pone un paro inmediato na e koperashon ku sindikato STSK. Esaki pasobra no tin e garantia ku den seno di STSK ta aktuá konforme regla i lei manera statutonan di e organisashon ta stipulá.
Presidente di STrAF, Juan Lourens ta konfirmá pa EXTRA ku ayera anochi a manda un karta pa direktiva di STSK pa informá nan di e desishon ku ta pone un paro inmediato na e koperashon entre e dos sindikatonan. STSK ta representá personal no dosente den enseñansa pero no ta representá den e órgano di konsulta entre sindikatonan i gobièrnu, GOA.
A base di e akuerdo di koperashon STrAF, ku si ta forma parti di e Komishon Sentral di Sindikatonan den GOA, tabata kana huntu ku STSK pa sali na interes di e trahadónan i atendé asuntunan di enseñansa den e órgano di konsulta. Sinembargo último tempu a surgi basta diskushon den seno di STSK riba kumplimentu ku regla konforme loke statutonan ta stipulá.
Esaki tabata motibu pa STrAf tambe a inisiá ku un proseso pa pone su mes na haltura di kiko ta pasando. Sin ke bai den detaye di tur loke tabata akontesé den seno di STSK, Lourens ta bisa ku STrAF a papia ku tantu direktiva di STSK, presidente di e sindikato i e miembro ku a sali reklamá ku kosnan no ta kanando korekto.
A base di e kòmbersashonnan aki, Juan ta sigui bisa ku STrAF a yega na e konklushon ku kosnan no ta kana konforme regla manera stipulá den statutonan i reglamento di kas di e sindikato. Asta den e kòmbersashon ku a hiba ku presidente, Lutson Lucas a tuma nota di un posishon intransigente kaminda no a demostrá komprondementu pa e nesesidat ku e organisashon mester funshoná konforme regla.
“Pa no tacha integridat di sindikato StrAF i pa no tilda STrAF di ta partisipá den kosnan ku no ta korekto a tuma e desishon pa pone un paro inmediato na e koperashon ku STSK. E desishonnan ku a tuma den seno di STSK no ta bini bèk den regla i statutonan di e organisashon”, Lourens ta deklará.
