WILLEMSTAD.- Resientemente durante kasonan di infrakshon den tráfiko un hóben di 18 aña a presentá dilanti hues pa bisa ku e ta un studiante i no tin moda di paga.
Segun e prosèsverbal e hóben ta keda akusa di tabata kore un vehíkulo totalmente for di òrdu.
E vehíkulo no tabatin papel di kùr, seguro, karchi di impuesto ni no tabatin plachi di number pega.
Pa ku esaki el a risibí un but ku a suma un total di fl 800,-.
El a splika ku e dia ei, el a fia e vehíkulo serka su primu pa e djis bai atendé un asuntu i nèt polis a par’e. E outo no ta di dje i no tabata sa ku e vehíkulo no tin papel.
Segun e akusado eigenlijk e no ta haña ku e ta esun ku mester paga e but. E ta studiante i e no tin sèn pa motibu ku e no ta traha i e outo no ta di dje.
Riba esaki fiskal a bisa ku fo’i ora un persona drenta outo di ken ku e por ta, e ta para responsabel pa e vehíkulo.
Fiskal a bisa ku e ta bai tene kuenta ku e situashon finansiero di e akusado i ta demand’é na un but di 150 florin pa e karchi di kùr. Enbes di 500 florin pa seguro, fiskal a redusié na fl 250,- i 75 florin pa e impuesto.
E akusado a bisa ku ta su mayornan e tin ku pidi pa yud’e.
Hues den su desishon a bai kompletamente di akuerdo ku e demanda di fiskal.
