Studiantenan estranhero kendenan a tuma parti na manifestashon di Unversity of Columbia, ta keda deportá for di Merka. Esaki ta inkluí hóbenanan ku a biba praktikamente hinter nan bida na Merka.
NEW YORK (AFP).- Un studiante surkoreano di University of Columbia, Yunseo Chung, a kuminsá akshonnan legal kontra e gobièrnu di Trump, ku a dekretá un órden di ekspulshon dje pais kontra di su persona pa motibu di a tuma parti na manifestashonnan pro-palestino riba ‘campus’ dje universidat.
For di e regreso na poder di Trump, outoridatnan a intensifiká e preshon riba e prestigioso universidat, akusá pa e presidente republikano di a permití e movementu di protesta kontra e guera di Israel den Gaza, ku Trump ta kalifiká komo antisemita.
E kaso dje studiante di 21 aña, kende a emigrá pa Merka ku shete aña i tin residensia permanente, ta rekordá esun di Mahmoud Khalil, figura dje manifestashonnan di studiantenan, detené na kuminsamentu di yanüari i ekspulsá for dje pais ounke e tambe tin residensia permanente i ta kasá ku un norteamerikano.
Den su apelashon na tribunal, abogadonan dje surkoreano Yunseo Chung a konfirmá ku el a tuma parti na e manifestashonnan “komo apoyo na derechinan humano di palestinonan”.
Chung “no a organisá ni dirigí e manifestashonnan, tampoko a hasi deklarashon na prensa òf na universidat, e no tabatin papel komo lider”, segun su abogadonan. Komo tal, nan ta pidi hues pa ordená e gobièrnu di Trump pa para e proseso di ekspulshon kontra di Chung kende nan a bin ta buska, sin por ‘hañ’é, den vários residensia di studiantenan di Columbia University.
