ORANJESTAD – Toch studiantenan di Aruba cu drenta Aruba bek durante vacantie p.e. tambe mester paga e suma di 20 dollar ora nan drenta, como contribucion pa e RWZI plant. Nan lo por haya e placa bek si nan aplica pa esaki. Anteriormente a bisa cu esaki lo no conta pa studiantenan. E comunicado cu a sali diabierna di Aruba Wastewater Sustainable Solutions (AWSS) y Departamento di Inmigracion Aruba a participa diabierna atardi laat, cu temporalmente e procedura di Aruba online ED-Card specialmente pa e studiantenan no residente cu ta bishita e isla lo wordo afecta.
ENTRANTE INMEDIATO
Entrante inmediatamente, tur pasaheronan NO-residente, incluyendo studiantenan di Aruba den exterior, mester paga un Sustainability Fee di USD 20 na momento di completa e proceso di Aruba online ED-Card riba e website oficial: edcardaruba.aw pa drenta Aruba.
Nota: e pago aki ta obligatorio prome cu ricibi aprobacion di bo ED-Card.
Atencion Studiantenan!
Studiantenan den exterior cu completa e proceso di Aruba Online ED-Card por aplica pa un refund di e Sustainability Fee di USD 20.
Con pa aplica pa e refund (haya placa bek)?
Manda un email na info@awss.aw y inclui:
- Bo ED-Card como attachment
- Email adres cu a wordo usa pa e pago
- Un prueba di bo schoolverklaring of inschrijving
Mientrastanto nos ta trahando ariba un solucion special pa nos studiantenan, pa automaticamente nan wordo exonera di e pago den futuro. Nos tin como meta pa hasi e proceso uno facil y eficiente pa e studiantenan.(NoticiaCla)
