Elica Ras

University òf Curaçao ta forma parti di e programa Erasmus Plus. Ta trata aki di un programa ku ta duna hóbennan studiante di UoC e oportunidat di sigui un semèster di nan estudio òf kore stazje den paisnan ku ta forma parti di Union Oropeo. Elica Ras ta mènedjer na UoC den Student Affairs i tambe International Office ta parti di dje. Erasmus Plus ta un proyekto ku Kòrsou (UoC) ku ta kai bou di Ulanda i aki tambe por hasi uso di dje. Union Oropeo ta pone fondonan disponibel na tur pais ku ta kai bou di EU pa promové e parti di mobilisashon di hóbennan den henter Oropa. Siendo Kòrsou parti di Ulanda, aki tambe por apliká pa e fondonan. I kumpliendo ku nan rekisitonan, na 2015 por a kuminsá ku e promé selekshon pa studiantenan di UoC por haña un beka, dependé e pais i kon largu nan ta keda, pa nan por kubri nan gastunan mas pisá manera ticket, hür di un kamber, bòrg. E beka ta yuda kubri e gastunan pa e bira mas aksesibel pa e studiantenan sigui un semèster òf stazje. Despues di a hasi e preparashonnan, na 2016/2017 e promé grupo di studiante di fakultat general, studiantenan pa dosente di idioma tabata e promé grupo ku a  Artevelde Hogeschool na Bèlgika Ghent ku ta un partner di universidat na Kòrsou. Ei nan a pasa un semèster pa sigui lès i kombiná ku stazje pa nan partisipá den e parti di práktika. E programa aki ta mara na un kantidat di studiante segun Elisa. Ta sera un akuerdo ku e universidat den eksterior kaminda studiantenan di UoC ta bai i mesun kantidat di nan por bin aki tambe. Esei ta e parti di interkambio. I den kaso di stazje ta dependé di e temporada. Elica Ras a enfatisá ku e regla básiko ta ku nan por bai kualke pais ku ta kai bou di Union Oropeo ménos Ulanda. “I esei ta komo nos ya parti di reino ulandes e ta konsiderá ku bo ta na kas”.

 

Vários hóben ku a partisipá na e programa di Erasmus+ a konta nan eksperensia;

 

Ashanti Elizabeth di 22 aña ta studiando International Business and Studies den su di 4 aña. E ta den su último aña di estudio i resientemente el a bai Bèlgika den kuadro di interkambio di estudio. El a bai Ghent na Bèlgika kual tabata un eksperensia inolvidabel. “Mi a krese komo studiante i persona bishitando Artevelde Hogeschool”. El a skohe e vaknan ku tabata un reto pe. Ashanti ta un hende masha independiente pero den e kaso aki tabata manera el a keda benta den laman grandi i e tin di sobrebibí. Un di su debilidatnan tabata ku e hopi reserva. Einan e mester a papia i sera konosí ku otro hende loke sigur a benefis’é komo studiante i komo persona. Su estudio ta na ingles aki na Kòrsou i na Bèlgika tambe el a sigui na ingles teniendo na kuenta e variashon di kultura huntu siguiendo e estudio. Pa Ashanti ta mas fásil e sigui su estudio na ingles.

 

Robert de Jongh di 24 aña tambe a biaha pa Bèlgika den kuadro di e programa di interkambio. Robert ta splika ku loke e yu di Kòrsou ku bai afó tin na su bentaha ta ku aki nos ta biba den un kultura di diferente pais huntu i esei ta pone ku nos ta papia diferente idioma. I einan na Bèlgika teniendo na kuenta ku ya na Kòrsou ta papia dos te tres idioma a hasié mas fásil pa por komuniká ku e hendenan na Bèlgika mes. E kos mas benefisioso ta ku universidat aki ta ekipá nan ku e material nan nesesario pa nan di nan parti por apliká esei den nan estudio den ekstranheria. Robert tambe a bishitá Artevelde Hogeschool kual tabatin un balor agregá pe mirando e diferente profesornan ku a bai duna lektura na e skol. Esei ta ekspandé bo horizonte riba diferente área i bo ta traha ku diferente studiante, no di Bèlgika so pero tambe di Fransia, Gresia, Nort Korea i asina ta siña parti di nan kultura i siña e diferente di enseñansa ku esun aki i asina haña un bista kiko ta mihó pa apliká pa na na benefisio di e studiantenan. Den kaso di Robert el a keda 6 luna na Bèlgika. El a apresiá mashá e forma ku nan a keda risibí na Bèlgika kaminda nan a sinti ku nan ta un di nan (Bèlgika).  Robert : mi a sinti mi na kas.

 

Allan Carolina ta studia na UoC pa dosente di ingles ‘2de graads’. Allan tambe a bai Bèlgika i el a siña masha hopi tantu personal, emoshonal i profeshonal. El a splika ku pa loke ta e parti personal i emoshonal el a siña kon ta biba independiente ku tabata un balor agregá pe. E loke mas el a realisá einan ta e balor pa su mes isla i e balor pa e universidat kaminda e ta studiando aki na Kòrsou. Hopi biaha ta keda bisá ku e nivel di edukashon aki ta hopi abou i si no mira i eksperensia otro bo ta keda kana ku esei den mente. Ora Allan a bai Bèlgika el a ripará ku e preparashon ku ta haña aki, e parti práktiko pe sigur ku ta siñando pa dosente tabata riba nivel i asta un tiki mas kompará ku otro studiantenan. Komo ehèmpel Allan a splika ku e otro studiantenan na Bèlgika tabata bisa nan ku nan ta haña 2 luna di stazje komo dosente miéntras aki na UoC ta bai stazje henter aña dos pa tres dia pa siman for di e di 2 aña. “Pa bo mira nos ta un isla asina chikí den Karibe i tòg nos ta hopi bon prepará pa  e parti profeshonal sigur den enseñansa”. Allan ta sintié un dosente for di edat masha yòn. Su mama semper a bisé ku su karakter pasivo, e forma ku e ta trese kos dilanti na otro hendenan ta ideal pa ta un dosente. Allan su famia ta di Isla Riba i e ingles tabata algu natural pe i komo tal el a skohe tambe pa e ingles. Teniendo na kuenta kon nos hóbennan ta awendia Allan a bisa ku e manera pa dil ku studiantenan tin hopi di aber pa kon e dosente ta aserká nan. E ta demostrá rèspèt ku e ta ferwagt bèk, e ta demostrá norma i balor ku e ta ferwagt di e dosente. E dosente ta un ehèmpel i si e dosente ta sali lihé for di su kueru e no por ferwaktu ku e studiante ta komportá su mes di e manera adekuá den klas. Tur kos ta dependé di e forma kon e dosente ta pa ku su studiantenan.

 

Jainayro George ta den su di kuater aña direkshon ICT den fakultat tékniko. Jainayro a kore stazje na Madrid Spaña na un kompania franses. Tabata un grupo dinámiko i hóben. Janaiyro a bisa ku desaroyonan ta ferwaktu ku bo ta haña ‘front i back end’ (Tur loke e usuario ta hañ’é konfrontá kuné i e loke ta tuma lugá patras pa loke ta datos, struktura, loke ta saka i pone den e data base”  pero tòg den eksterior ta separá e dosnan aki. I na UoC e parti tékniko ta duna tur dos i esaki ta nifiká ku studiantenan di aki ta mas ku bon prepará pa kore stazje afó i pa traha tambe.

Dikon skohe pa UoC….

 

Hopi ta ser papia di UoC, hopi kos bon pero tambe ménos bon i esaki e hóbennan aki a tende riba kaya. Jainayro por ehèmpel ta splika ku e kier a bai traha ora el a kaba su MBO pero tabata difísil pa haña trabou. Un amigu di dje a motiv’é pa e sigui studia. E ta kòrda ku algun luna promé ku el a kuminsá universidat el a haña un trabou na UTS pero tòg el a skohe pa bai studia.

Ashanti semper kier a bai Merka pa studia. Ora su tempu tabata yegando kabando skol sekundario. Ashanti a tende kos malu so di UoC. Pero e mes kier a eksperensiá i p’esei el a skohe pa bai dia habrí di universidat, papia ku dosentenan i el a wòrdu konvensé pa no solamente keda Kòrsou pero pa bai studia na UoC. “Tur loke mi a tende promé no ta bèrdat. E dosentenan ta para nos tras i ta motivá nos. Tin kosnan ku ta pasa bèrdat ku por demotivá bo pero mi a eksperensiá muchu mas kos bon. Mi a skohe pa aki i Kòrsou ta mi lugá”.

Robert di otro banda ta biba independiente for di su 16 aña. El a bin for di Boneiru pa sigui studia na Kòrsou. Promé e kier a bai studiando na Canada pero el a konosé un damita i a kai den stimashon i a keda Kòrsou. Ora e kaba su estudio e lo bai traha den eksterior. Allan sinembargo a hasi merkado promé ku el a bai studia pa dosente. I den e tempu ei kaba e kier a bai studia den eksterior. Pero el a kambia di pensamentu. E ta haña enseñansa e fundeshi di un sosiedat i el a sinti ku e ke pa Kòrsou ta mas desaroyá i p’esei el a skohe pa keda Kòrsou i duna su kontribushon aki na Kòrsou. E ke traha pa yuda avansá Kòrsou. E ke traha pa engrandesé e Kòrsou ku  ke wak aki 10 aña.

 

Konseho….

 

Ashanti su konseho na futuro studiantenan universitario ta pa no bai tras di amiga. Para den bos mes sapatu i para pa loke bo ta kere aden i loke bo ke. Studia algu ku bo tin pashon pe i no studia nada djis pa studia. No sera porta pa bo mes. “Ami a hinka den mi kabes ku ta Merka mi ke bai i mi no a mira e gran oportunidat ku UoC tin pa mi”. I den e dia habri na UoC ta duna tur informashon i nesesario pa e futuro studiante.

 

Robert: “Mayoria hende ta spanta ora nan tende ku nan tin di bai hasi interkambio den nan stazje den eksterior i hopi no ke bai. E ta simplemente un oportunidat pa bo krese komo persona i konosé otro partinan di mundu. No solamente e parti edukashonal pero tambe konosé e lugá mes. Nos a haña oportunidat pa konosé Oropa i nos a konosé diferente lugá na preis barata i nos ta tuma bentaha di dje. Kòrsou ta leu i bo ta pensa dos biaha pero siendo einan bo tin oportunidat pa ekspandé. Si bo tin e oportunidat tum’é. No laga djis pasobra ta for di bo kas bo tin miedu di bai kaba di eksperensiá kiko e mundu eifó tin”.

 

LAGA UN KOMENTARIO

Please enter your comment!
Please enter your name here