WILLEMSTAD. – Vivente SBO ku ta forma parti di skolnan VPCO, den kooperashon ku Impacto, djaluna 4 di mei tabatin un ‘Kookchallange’ ku a tuma lugá na Marnix College Cas Cora. Na e okashon akí 5 studiante a bai pa e reto, esta studiando pa entre otro ‘Junior Chef de Partie’ i ‘Junior Sous Chef’.
Vivente SBO ta ofresé, komo e úniko skol aki na Kòrsou, un estudio kombiná ku trabou. E studiantenan tin kuater dia ku nan ta kue eksperensia di trabou na un restorant i un dia nan ta haña teoria. Pa partisipá na e estudio aki, e studiantenan mester ta traha na un restorant aktivamente.
Durante e reto, studiantenan mester a prepará un plato ku ta keda evaluá pa un tim di hurado formá pa 6 persona.
Despues ku kada studiante a prepará nan plato ku hopi dedikashon, nan a ofresé esaki na e miembronan di hurado ku a skor e puntonan.
Despues ku kada hurado a nota nan puntonan, a resultá den tres studiante ku a sobresalí. Keyon Brodie (Valeco) a logra promé puesto, siguí pa Kyona Gabriel (Lemon Tree) i na di tres lugá Luca Steward (Salú).
Ku e evenementu aki, Vivente SBO no solamente ke hasi e talento di nan studiantenan konosí, pero ke pone atenshon na un reto muchu mas amplio, esta e falta di personal kualifiká den e sektor di horeca.
Finalmente, e loke ku ta remarkabel pa Vivente SBO ta e echo ku te ainda e skol akí ta duna lès sin ta haña supsidio di Gobièrnu, apesar di e kontribushon ku nan ta duna den e sektor laboral.
