Toque de queda ta kuminsá 9’or, vários tipo negoshi por kuminsá habri

WILLEMSTAD.-E konferensia di prensa ku hinter komunidat tabata pendiente di dje a tuma lugá. Premier Eugene Rhuggenaath a informa komunidat di e kambionan ku ta drenta na vigor entrante mayan 4 di mei 2021. Premier a enfatisá na vários okashon ku ta habri pero di forma responsabel pa evitá ku despues di algun dia mester bolbe tuma medida drástiko atrobe.

Promé minister a lamentá ku a krea informashon riba retnan sosial bisando ku lo tin pleitu entre dr. Izzy Gerstenbluth i ministernan relashoná ku habrimentu di Kòrsou si òf no. El a mustra apresio pa e trabou inkansabel ku dr. Izzy i hinter e tim di epidemiologia a hasi i ta hasiendo ketu bai.

Pa loke ta trata suavisashon di medidanan sr. Rhuggenaath a informa ku  ‘toque de queda’ ta kambia na lugá di 7’or e lo kuminsá entrante mayan 9’or di anochi i lo dura te 4:30 di mainta. Plachi di Dia ta keda intakto, pasobra despues di basta deliberashon a yega na e konklushon no ta responsabel pa kita plachi di dia. Premier a bisa ku tur hende ku mester bai traha por hasi esei libremente anto ku pa dia 17 di ei próksimo lo bini bèk riba e punto ei.

Transporte publiko por sigui kore te 9’or anochi, meskos ku esnan ku ta brinda ‘mantelzorg’ tambe por sigui hasi esei na e orario kustumbrá. Restorantnan ku tin un terasa por ofresé servisio riba tera kaminda di djaluna pa djasabra por risibi kliente. No por tuma mas ku 50% di e kapasidat, ademas na mesa so lo por sirbi bebida alkohóliko. E restorantnan ku no tin terasa por brinda servisio di entrega na kas òf curb side. Trùknan di pan tambe por brinda servisio curb side òf di entrega na kas, pero NO na e trùk.

Negoshinan hardware por permití klientenan bai paden pa hasi nan kompra, meskos ku negoshinan ku ta bende artíkulonan elektróniko. Instansianan finansiero por habri pa brinda tur servisio i trabou di drechamentu di kaya por kuminsá atrobe. Konstrukshon general si ni no por kuminsá ainda. Mas detaye den edishon di EXTRA.

 

LAGA UN KOMENTARIO

Please enter your comment!
Please enter your name here