GINEBRA, SUIZA (AFP).- Suisa djaluna a debolbé na Bolivia tres momia pre-colombina di vários shen aña di antigwedat. Esaki a tuma lugá den un pleno movementu na fabor pa duna bèk restunan humano, obra i ophetonan na e pais di orígen di parti di museonan oksidental.
Den un seremonia, e Museo di Etnografia di Ginebra (MEG), su direktor, Carine Ayélé
Durand, a trese dilanti ku e siudat ta hasi “un gesto fuerte segun étika pa debolbé e restunan humano na su benefisiarionan, manera ya nan a hasi den 2014 ku e petishon dje pueblo maori di Aotearoa, e nòmber maori di New Zealand.
“Ginebra, siudat di pas i diálogo, sede di organisashonnan internashonal, mester duna ehèmpel”, segun e dirigente munisipal, Sami Kanaan, promé di a debolbé e kahanan ku ta kontené e momianan na e minister boliviano di Kultura i Deskolonisashon, Sabina Orellana Cruz.
E tres kurpanan humano momia a keda hinká den kahanan di palu grandi, riba kua e kònsùl boliviano a na Suisa a pone un stèmpel pa nan biaha ku “rekonosimentu diplomátiko” den avion.
E museo di Ginebra a komprometé su mes e último añanan pa “duna bèk di forma inkondishonal” di restunan humano, ophetonan funerario i sagrado na e legítimo propietarionan.
Segun e museo, e tres kurpanan ku a bai tin indikashon di kustumbernan funeraria pre-colombina -promé ku yegada di spañónan- na e region serka dje lago di Titicaca. Nan ta di kulturanan di orígen aimara ku a establesé nan mes den e zona entre aña 1.100 i 1.400.
E kurpanan momifiká a wòrdu mandá den 1893 for di La Paza pa e Sosiedat Geográfiko di Ginebra pa e ingeniero suiso Gustave Ferriere (1845-1916), ku tabata kònsùl aleman dje siudat.
E traslado a tuma lugá sin konsentimentu di e doñonan tradishonal ni outorisashon formal, segun e museo.
