BEIJING ( AP).- Dos hòmber ku supuestamente a trata di sekuestrá un avion na China batiendo e porta di e pilotnan ku un krùk i trata di instalá supuesto eksplosivonan, a muri dor di e heridanan kousá durante un pela ku e pasaheronan i e tripulashon, asina medionan ofisial di komunikashon a bisa ayera.
Informenan anterior a bisa ku seis hòmber di etnia sigur a keda arestá djabièrnè despues di e intento frakasá di sekuestrá e avion den e region wèst di Xinjiang.
Kuater tripulante a resultá heridá den e pelea. Xinjiang ta alohá un gran poblashon di uigurnan, ounke e ta wòrdu goberná pa e etnia han, ku ta mayoria na China. Tabatin enfrentamentunan entre outoridatnan i gruponan di uigurnan resentí pasobra e gobièrnu ta kontrolá nan religion i nan kultura.
Gruponan di derechinan humano a bisa ku e insidente no tabata un intento di sekuestro di avion, sino un pelea durante e buelo pa e disputa di un asiento.
E korant Global Times dirigí pa e gobièrnu, a reportá ku dos di e sospechosonan a muri den un hospital debí na e heridanan kousá den e pelea ku e pasaheronan i e tripulashon, pero no a bisa ki dia. E informe a sita funshonarionan lokal ku no a keda identifiká. Global Times a bisa ku dos mas a keda hospitalisá despues ku nan mes a mutilá nan mes, pero tambe a duna detayenan.
E informe a bisa ku outoridatnan tabata investigá kon e hòmbernan, entre 20 i 36 aña, a logra burla di e revishon di seguridat i introdusí e eksplosivonan den e avion.
E bosero di gobièrnu regional di Xinjiang, Hou Hanmin, a bisa ayera ku e no por a konfirmá si algun di e sospechosonan a muri.
Hou a bisa ku e hòmbernan a desarmá e krùknan di aluminio i nan a usa e piesanan pa ataká e personanan ora nan a trata di drenta den e kabina di pilotnan. El a agregá ku nan tabatin material ku a kere tabata eksplosivo ounke ainda polis no a studia esei.
E avion ku 92 pasahero i nuebe tripulante a regresá e siudat Hotan, na sùit di Xinjiang bon, 22 minüt despues di a lanta, asina e aerolinia Tianjin, a bisa.
