JOHANNESBURG, SURAFRIKA, AFP.- Suráfrika a anunsiá e promé etapa pa kuminsá fábrika vakunanan kontra COVID. Pero esaki lo tuma tempu i miéntras tantu “mas hende ta sigui muri” segun presidente Cyril Ramaphosa a atvertí.
E mandatario surafrikano a bisa ku mester krea un kapasidat regional di produkshon mirando ku no por konta ku vakunanan produsí den eksterior pa motibu ku nan no ta yega e kontinente.
“E vakunanan no ta yega na tempu i hende ta sigui muri”, asina el a bisa durante un konferensia di prensa di Organisashon Mundial di Salú.
Suráfrika tin 35% di tur kaso di COVID-19 registrá den Afrika i ta sufriendo di un terser ola masivo di infekshon.
Meskos ku otro paisnan den desaroyo, e ta mira kon tur pais riku ta haña vakuna. Solamente 2% di e poblashon di e kontinente afrikano tin por lo ménos un inyekshon kontra covid-19, segun indikashon di presidente Ramaphosa, miéntras ku Merka i Europa tin kasi 70% di e pueblo kompletamente vakuná.
