JOHANNESBURG, SURAFRIKA, AFP.- E presidente surafrikano, Cyril Ramaphosa a anunsiá djárason ku lo habri frontera i outorisá entrada di mayoria biahero kuminsando 1e di òktober, despues di un lockdown estrikto imponé riba 27 di mart.
E pais mas industrialisá di e kontinente afrikano a tuma medidanan estrikto pa limitá ekspanshon di COVID-19.
Tur frontera ta será desde mart, pero gobièrnu a kuminsá suavisá e restrikshonnan den e pais.
E presidente a bisa ku lo suavisá tur restrikshonnan di biahe internashonal gradualmente i ku koutela.
“Pero biaheronan di paisnan ku tasa haltu di infekshon ta keda restringí”.
Suráfrika lo publiká un lista di e paisnan aki, segun indikashon di e presidente.
Suráfrika a registrá mas di 650.000 infekshon i mas di 15.600 morto te ainda, kual ta mas di mitar di tur kaso di Corona vírus den e kontinente.
Pero e kantidat di kasonan nobo a baha. Outoridat tabata reportá 12.000 kaso diario den yüli i ta reportando 2.000 aktualmente.
