JOHANNESBURG, SURAFRIKA, AFP.- Suráfrika a lansa un kampaña di vakunashon na gran eskala dirigí na tur esnan riba 60 aña i personanan den grupo di riesgo djaluna.
E gobièrnu kier vakuná 16,6 mion persona den seis luna, inkluyendo sinku mion di tur esnan riba 60 aña di awe te fin di yüni.
Suráfrika por kumpli ku e meta aki solamente si e vakunanan keda entregá na tempu, segun indikashon di e minister di salú, Zweli Mkhize. “Nos ta spera ku Suráfrika lo haña 4,5 mion dósis di Pfizer i dos mion di Johnson & Johnson”, segun Mkhize a bisa na periodistanan.
Suráfrika, e pais afrikano ofisialmente mas afektá pa e pandemia, ku mas di 1,6 mion infekshon di kual 55.210 a muri a vakuna solamente 1% di su poblashon te ainda.
E pais a deskartá e vakuna britániko AstraZeneca despues di duda tokante esaki su efikasia kontra e variante lokal. Despues di esaki, e vakuna merikano Johnson & Johnson a keda suspendé na komienso di aprel despues ku e pais a nota kasonan di pròp di sanger den Merka.
E gobièrnu a reanudá vakunashon di 1,25 mion persona ku ta traha den e sektor di salú.
