JOHANNESBURG (AFP).- Gobièrnu surafrikano ayera a akudí n’e máksimo tribunal dje pais pa purba na stroba un findishi, na Merka, di ophetonan ku a pertenesé na Nelson Mandela, argumentando ku nan ta forma parti di e patrimonio nashonal. E bataya hudisial ei, ku a kuminsá kuater aña pasá, ta afektá 29 opheto, for di e sédula dje héroe di e lucha kontra di apartheid te ku algun di su kamisanan komo eks-presidente.
Un kas di findishi norteamerikano, ku kolaborashon di un dje yunan muhé di Mandela, ta pretendé pa pone e piesanan na benta. E Agensia Surafrikano di Rekursonan Patrimonial (SAHRA) i Minister di Kultura a solisitá na e Tribunal Konstitushonal pa deklará komo ilegal tantu e benta komo eksportashon dje artíkulonan, alegando ku nan mester keda den Suráfrika.
E ophetonan ei “ta keda konsiderá komo propiedatnan patrimonial i nan eksportashon sin outorisashon ta ilegal”, segun nan a bisa, esaki di akuerdo ku un resúmen publiká pa e tribunal.
Anunsiá na un promé instante den 2021, e findishi organisá pa Guernseys, un kas di findishi ku sede na New York, a keda suspendé den 2022 despues ku SAHRA a start un kaso den korte. Despues ku hustisia surafrikano a duna su oké pa e benta, esaki a keda anunsiá di nobo den 2024, promé di bolbe keda suspendé miéntras ku gobièrnu a sigui ku intentonan pa para e findishi por kompleto.
Tribunal Supremo di Apelashon den luna di yanüari a rechasá e puntonan trese dilanti di parti di SAHRA, konsiderando ku e organisashon enkargá ku protekshon i patrimonio “mester demostrá te kon leu por papia di ophetonan patrimonial”, segun e resúmen.
Makaziwe Mandela, un dje yunan di Mandela, a outorisá e benta ku meta pa finansiá e konstrukshon di un hardin konmemorativo serka dje graf di su tata, den e pueblo di Qunu.
Entre e ophetonan ta figurá paña di bisti, kartanan i regalanan ofresé di parti di presidentenan merikano, entre nan Barack Obama i Bill Clinton.
Mandela a keda eligí den mei di 1994 komo presidente di Suráfrika demokrátiko i a ehersé e funshon te ku yüni di 1999. El a muri den desèmber di 2013 na edat di 95 aña.
INTERNASHONAL 3 – NELSON MANDELA
