…Presidente surafrikano Cyril Ramaphoso den su diskurso ayera na okashon di apertura di aña parlamentario nobo…
KAAPSTAD, Suráfrika.- Suráfrika “no ta laga otronan intimid’é”, segun atvertensia dje presidente Cyril Ramaphosoi den su diskurso anual relashoná ku e nashon, despues di vários krítika dje gobièrnu di Donald Trump.
“Nos no ta laga otronan desanimá nos. Komo surafrikano nos ta un pueblo ku no ta laga nan intimidá nos”, di akuerdo ku e hefe di estado den su diskurso pa marka inisio dje aña parlamentario. Ounke e presidente dje ekonomia prinsipal di Afrika no a menshoná spesífikamente Merka,su intervenshon a mustra di ta un reakshon riba deklarashonnan di Trump kende djadumingu riba Truth Social a akusá Suráfrika di ta “konfiská” tera i a afirmá ku e pais ta “trata sierto kategoria di persona hopi malu”.
“Lo mi kòrta tur futuro finansiamentu pa Suráfrika te ora ku kompletá un investigashon kompleto dje situashon”, segun e mandatario republikano.
Ramaphosa a firma un lei ku ta stipulá ku gobièrnu por, den algun sirkunstansia, ofresé “sero kompensashon” pa e propiedatnan ku el a disidí na konfiská pa motibunan di interes públiko.
E propiedat di tera ta un tema difísil na Suráfrika, ya ku e mayoria di tera di plantashon ta sigui ta den man di hendenan blanku, despues di dékadanan ku a pone fin na apartheid i ku gobièrnu ta bou di preshon pa implementá reformanan.
E mionario Elon Musk, kende a nase na Suráfrika i ku ta un asesor hopi serka dje presidente norteamerikano, a akusá su pais natal di tin “leinan rasista relashoná ku propiedatnan”.
E krítikanan a sigui i e hefe di diplomasia norteamerikano, Marco Rubio, a anunsiá di lo no asistí na un reunion di kansiernan di G20 na Johanesburg dianan 20 i 21 di febrüari, ya ku el a akusá Suráfrika di tin un agènda “anti norteamerikano”.
