Suzanne Huurman impreshonando den su promé dianan ku selekshon

MELBOURNE.- Suzanne Huurman, kende ta dòkter nobo di selekshon di Kòrsou, ta impreshonando den su promé dianan di trabou ku selekshon.

Huurman a kai den bon tera serka hungadónan i tambe serka miembronan di e staf ku tabat’ei kaba.

Por a wak for di ora ku e hungadónan a yega Australia, Huurman a  hasi tèstnan físiko ku kada unu. Algu similar ku ekiponan ta hasi, ora nan ta hasi tèstnan médiko ku hungadó promé ku un transferensia.

Suzanne Huurman ta move tambe bon prepará na ‘training’ i wega, ku su tas ku ta kontené tur kos ku mester pa asistí hungadónan.

Banda di esaki Huurman ta kontinuamente den kòmbersashon ku e kuerpo di fisio, kual den dje tin Clinton Leocadia, Robert Duncan i  Royston Corasol. Esaki pa asina e sera konosí mas mihó ku nan, i alabes sa mas di e hungadónan.

Huurman huntu ku  Ramfis Fillet lo forma e duo ku lo enkabesá e kuerpo médiko durante Mundial. Dòkter Fillet, pa motibu personal no t’ei na Australia.

Banda di tur e kosnan aki Suzanne Huurman, ku a traha pa Real Madrid, PSV i tambe City Group, a mustra di ta un persona habrí i profeshonal.

E por komuniká tantu na hulandes, ingles i tambe spañó. Miéntras el a mustra tambe habrí pa siña papiamentu.