Di akuerdo ku e dekreto di tarifanan médiko:

WILLEMSTAD. – Banko di Seguro Sosial ta lamentá ku den un tempu di krísis aktual botikanan a tuma e desishon pa kobra pashèntnan diferensia di preisnan di remedi. SVB kier rekordá botikanan ku di akuerdo ku e dekreto di tarifanan médiko no por kobra klientenan pa diferensia di preis. SVB ta konsehá klientenan pa entregá un keho via 434-4000 òf e-mail: svb@svbcur.org

SVB kier aklará ku for di aña pasá SVB a haña un tarea pa redusí gastunan riba remedi, spesialista, kuido médiko den eksterior i laboratorio. E tarea ta basá riba un rapòrt di Taskforce Marktordening en Financiering Zorgsector ku a bini ku medidanan pa ekonomisashon i realisashon di un salubridat pagabel i efisiente i pa por paga gastunan èkstra di hospital nobo.

Den kuadro di esaki SVB a papia ku sektornan pa yega na un akuerdo riba e tarea ku SVB a haña.

Esensial den e kombersashonnan tabata e mandato pa sigui supstituí remedinan di marka ku remedinan  genériko i redukshon di e márgen di ganashi riba remedi di marka.

Na final di 2019 a konkluí i informá e sektor di remedi ku mester baha e márgen di importadó di 20 pa 10% riba remedinan di marka miéntras e márgen ta keda 20% pa remedinan genériko. Esaki ta stipulá den un dekreto gubernamental (Landsbesluit) pa nos Gobièrnu.

Ministerio di asuntunan ekonómiko MEO a saka un lista di preisnan máksimo pa remedi den mei 2020 a base di e medida i Lei menshoná. Na yüni SVB a manda karta pa botikanan i importadónan di remedi pa informá di implementashon di e preisnan nobo entrante 15 sèptèmber 2020, teniendo kuenta ku un término di transishon di 3 luna i ku nan mester kumpli ku e preisnan nobo stipulá pa MEO.

Asosashon di Botikanan i asosashon di importadónan di remedi a hasi opheshon, pero a sigui na mesa di kombersashon i no a yega na un akuerdo promé ku e fecha. Un reunion lo tuma lugá a korto plaso entre SVB, botikanan, importadónan, MEO i Inspekshon di remedi. Asosashon di botikanan a duna di konosé ku si no posponé e implementashon nan ta bai kobra e klientenan e diferensia di preis.

SVB ta lamentá e desishon aki i ku algun botika a disidí pa bringa e disputa atraves di klientenan ku ta nan kliente komo aseguradonan di SVB. No ta korekto ku ta usa e klientenan den e disputa.

SVB kier bolbe rekordá botikanan ku di akuerdo ku e dekreto di tarifanan médiko no por kobra klientenan pa diferensia di preis i ku esaki ta nifiká ku botikanan ta aktua kontra di leinan vigente den nos Pais. SVB ta konsehá klientenan pa entregá un keho via 4344000 òf e-mail: svb@svbcur.org. SVB ta spera ku sano huisio lo prevalesé i lo sigui hasi esfuersonan pa yega na un solushon ku ta kunbiní tur partido envolví.

 

 

LAGA UN KOMENTARIO

Please enter your comment!
Please enter your name here