WILLEMSTAD.-EXTRA a tuma nota di un nota ku Banko di Seguro Sosial (SVB) a saka awe mèrdia. E nota ta dirigí na tur empleado, pues tur hende ku tin kobertura di seguro médiko via SVB. Kòrsou ta drentando e parti mas kayente di aktividatnan di karnaval, kuminsando mayan djabièrnè ku parada di tiner, ta sigui djasabra ku e karnaval di Banda Bou, djadumingu tin e Gran Marcha, e djaluna siguiente tin despedida di marcha di mucha i djamars despedida di marcha di hende grandi.
Teneniendo na kuenta ku a sosodé na algun okashon ku hende ta indiká di ta malu, pero tòg ta mira nan ta gosando di e fiestanan SVB a emití un informe ku ta duna klaridat.
E nota di SVB ta indiká ku ta kòrda tur empleado ku partisipashon na festividatnan, manera karnaval, durante un periodo di inkapasidat pa trabou=AO, no ta permití. Di akuerdo ku e lei di seguro di malesa, inkapasidat pa trabou ta nifiká ku un empleado no por òf no ta permití pa hasi su tareanan normal, entre otro pa no stroba e proseso di rekuperashon. Tambe pa prevení empeorashon di su estado di salu i tambe evitá infekshon di otro personanan.
Si determiná ku un hende ta partisipá na festividatnan durante un periodo di AO lo stòp e benefisionan mesora i SVB por sigui ku mas medida.
