Eks-direktor di Centers for Disease Control (CDC), dr. Demetre Daskalakis, ta keda saludá miéntras ku empleadonan i sostenedónan di CDC a para ward’é pafó di ofisina prinsipal di CDC pa duna rekonosimentu na su persona i otro dos profeshonal kendenan a retirá despues ku presidente Trump a duna retiro na e direktor di CDC Susan Monarez.
WASHINGTON (AFP).- Nuebe èks-direktor di e agensia prinsipal di salú di Merka a alertá ayera ku a desmantelashon dje organisashon di parti dje gobièrnu di Donald Trump i a atvertí ku e minister anti-bakuna Robert F. Kennedy Jr ta “poniendo e salú di tur norteamerikano na peliger”.
E kolumna kontundente publiká den The New York Times ta e último di un seri di atake kontra dje sekretario di salú despues ku e direktor di Sentro pa Kontrol i Prevenshon di Enfermedatnan (CDC) resientemente a keda retirá di parti di Trump despues di apénas algun siman na e funshon.
Susan Monarez a keda despedí siman pasá despues di un konfrontashon ku RFK Jr i di a nenga na komprometé pa duna su apoyo na e kambionan dje minister den e polítika di bakunashon.
E destitushon a provoká retiro di por lo ménos kuater funshonario haltu i a hinka e agensia den un káos aun mas grandi.
“Nos ta dirigí CDC: Kennedy ta poniendo e salú di tur norteamerikano na peliger”, segun atvertensia dje artíkulo di opinion skirbí pa e nuebe èks-titularnan di e agensia histórikamente independiente ku a sirbi bou di tur presidente, demokrat- òf republikano for di Jimmy Carter te ku Donald Trump.
“Loke ku Kennedy a hasi di CDC i e sistema di salú públiko dje pais -kulminando den su desishon pa despedí dra. Susan Monarez komo direktor- ta algu ku nunka nos a mira den e agensia, i algu ku nos pais nunka a eksperimentá segun e ekspertonan a skirbi.
Nan a menshoná ku Kennedy a despedí míles di trahadó sanitario federal; el a debilitá programanan destiná pa protehá norteamerikanonan di kanser, di atake di kurason i mas; i durante e mayor brote di sarampi den dékadanan, el a bai pone atenshon riba “tratamentu no komprobá miéntras ku el a minimisá bakunanan”.
Tambe el a defendé un lei federal ku lo por laga miónes di hende sin seguro médiko, segun nan a bisa.
“E kos akí ta inaseptabel i mester alarmá tur norteamerikano, independientemente di nan inklinashon polítiko”, segun e ekspertonan, inkluso e doktor Anne Schuchat, kende a traha komo direktor interino di CDC den e promé mandato di Trump.
E krítikanan fuerte a yega un dia despues ku Demetre Daskalakis, kende a renunsiá komo direktor di Sentro Nashonal di Inmunisashon i Enfermedatnan Respiratorio di CDC komo protesta pa e destitushon di Monarez, a atvertí ku “e muraya entre siensia i ideologia a basha den otro” den e agensia.
Mientrastantu, Trump a bisa pa hasi públiko mas informá riba e “vários remedinan kontra di covid” introdusí durante di e pandemia. “Hopi hende ta kere ku nan tabata un milager ku a salba miónes di bida. “Otronan no ta di akuerdo!”, segun Trump a publiká riba Truth Social.
“Ku CDC kedando destrosá pa e asuntu akí, mi ke un kontesta i mi ke esei awor akí!”, segun el a agregá.
