SAN FRANCISCO, USA (AFP).- E empresa norteamerikano di inteligensia artifisial Anthropic a duna di konosé di a deskubrí kampañanan di tres firma chines di AI pa di forma ilegal saka kapasidatnan di su ‘chatbot’ Claude, den loke a keda deskubrí komo robo di propiedat intelektual na eskala industrial.
Anthropic a señalá ku DeepSeek, Moonshot AI i MiniMax a usa un teknologia konosí komo “destilashon”, ku ta konsistí den uso di resultadonan di un sistema di AI mas potente pa hopi lihé mehorá e rendimentu di otro ku ta ménos kapas. “E kampañanan aki ta kresiendo den intensidat i manera sofistiká”, segun e empresa a bisa den un komunikado.
“E bentana di aktuashon ta hopi amplio. E destinashon ta un práktika komun den desaroyo di AI ku e empresanan sa usa pa krea vershonnan mas barata i chikitu di na mes modelonan. E práktika a kapta titularnan komo un aña pasá, ora ku e lansamentu di un modelo di AI mas barata di DeepSeek tabatin un rendimentu similar na e ChatGPT i otro ‘chatbox’-nan merikano lider, loke a lanta sospecho riba e hegemonia di Merka den e sektor akí. Anthropic a bisa ku e empresanan a logra nan metanan mediante mas o ménos 16 mion interkambio ku su modelo Claude i 24.000 kuenta falsu. Esaki a permití pa e tres laboratorionan di forma barata por a haña kapasidatnan ku nan no a desaroyá di forma independiente.
Hasiendo esaki, nan a skapa di kontròlnan di eksportashon di teknologia norteamerikano avansá, segun e empresa a duna di konosé.
OpenAI, rival grandi di Anthropic i kreadó di ChatGPT, a presentá akusashonnan similar serka legisladornan norteamerikano na komienso dje luna akí.
