WAUKESHA, MERKA, AFP.- Outoridatnan polisial di Merka a anunsiá djaluna ku lo akusá e sospechoso ku a manda su trùk den un multitut ku “asesinato”. E insidente a sosodé riba djadumingu anochi kontra un desfile di Pasku den estado di Wisconsin, lagando sinku morto i sinkuenta herido.

Kuater muhé i un hòmber entre 52 i 81 aña a muri 48 persona a keda hospitalisá despues di e insidente di djadumingu anochi den siudat di Waukesha, segun e último saldo konfirmá pa outoridatnan polisial, ounke e por sigui subi.

Di e hendenan interná den hospital, 18 tabata mucha, segun indikashon di Amy Drendel, hefe di medisina di emergensia di hospital Children’s Wisconsin. Seis di nan su kondishon ta kritiko.

E hefe di polis di Waukesha, Dan Thompson, a informá ku un hòmber identifiká komo Darrell E. Brooks ta “e sospechoso prinsipal di e tragedia sin sentido aki”. E lo wòrdu akusá ku asesinato.

Outoridatnan a deskribié komo un hòmber kolo skur di 39 aña di Milwaukee ku un kaso hudisial den su kontra pa violensia doméstiko.

Registronan hudisial ta mustra ku Brooks a wòrdu akusá vários biaha den e último dos añanan dor ku el a pone seguridat di otronan na peliger, usando un arma di kandela, entre otro.

LAGA UN KOMENTARIO

Please enter your comment!
Please enter your name here