WILLEMSTAD.- Despues ku Minister enkargá ku Desaroyo Ekonómiko sr. Eugene Rhuggenaath a tuma nota di kanselashon di Curaçao North Sea Jazz Festival (CNSJF) el a aserká Curaçao Tourism Development Foundation (CTDF) pa chèk e posibilidatnan pa garantisá kontinuashon di e evento aki. Esaki a resultá den firmamentu di un ‘memorandum of understanding’ (MoU) entre CTDF, Curaçao Airport Holding (CAH), Curaçao Investment & Export Promotion Agency (CINEX) huntu ku Fundashon Bon Intenshon (FBI) pa 5 aña entrante 2018.

E  MoU ta enserá lantamentu di un grupo di trabou ku e meta pa liderá e esfuersonan pa sigurá fondo for di stakeholders i/òf otro organisashonnan pa organisá eventonan grandi, entre nan CNSJF.

Esaki lo sòru pa Kòrsou keda posishoná komo “The Stage of the Caribbean”, un mekanismo fuerte di branding deliñá den e Plan Maestro pa Turismo 2015 -2020. Minister Rhuggenaath tambe a firma na nòmber di Gobièrnu di Kòrsou.

Di akuerdo ku Minister Rhuggenaath “Ta importante pa kontinuá ku e evento aki pa hopi aña mas i trese mas di e tipo di eventonan manera esaki pa krea aktividatnan ekonómiko pa nos pais Kòrsou.”

E delaster enkuesta hasí dor di University of Central Florida na aña 2015 ta mustra ku CNSJF tabatin un impakto ekonómiko direkto i indirekto di riba 15 mion dòler. E resultadonan di e enkuesta ta mustra tambe ku e montante ku e bishitante internashonal na CNSJF ta gasta ta riba 300 dòler pa dia kompará ku algu mas ku 100 dòler pa dia di e turista regular ku ta bishitá Kòrsou.

Ademas por indiká ku e kantidat di pasahero ku ta drenta via di nos aeropuerto pa dia durante e dianan di e festival ta riba 2000 pasahero kompará ku 1000 riba un dia regular. Tur e faktornan aki ta indikadónan importante ku ta hasi nesesario pa mantené CNSJF komo un evento ikono pa Kòrsou.

Otro aspekto positivo di CNSJF ta e konsiertonan grátis ku ta krea e plataforma úniko pa biahero internashonal keda mas largu riba nos isla i eksperensia nos músika lokal manera e presentashon di un orkesta filarmóniko presentando piesanan di Doble R i homenage na Macario Prudencia. Adishonalmente e konsiertonan aki ta un manera pa e bishitante interkambiá ku nos hendenan lokal i eksperensia nos hospitalidat.

CNSJF ta un festival musikal grandi i prestigioso ku for di aña 2010 ta keda organisá pa FBI. E festival di 3 dia ta inkluí presentashon di artistanan for di rònt mundu i ta konta ku partisipashon di personanan di diferente parti di mundu.

Banda di esaki, CNSJF ta duna un kontribushon vital na sektor di turismo i na ekonomia di Kòrsou den su totalidat. Motibu pa kua tur e partidonan envolví a palabrá ku CNSJF mester kontinuá pa hopi aña mas.

 Ta bai tin Curaçao North Sea Jazz den 2017

WILLEMSTAD.- Nos ta bai haña un edishon di Curaçao North Sea Jazz Festival den 2017. Fundashon Bon Intenshon, Curaçao Tourism Development Foundation, Curaçao Airport Holding i Curaçao Investment & Export Promotion Agency a yega na un akuerdo riba esaki. E stakeholdernan aki lo kontribuí finansieramente, p’asina garantisá e evento aki den futuro na Kòrsou.

Despues ku a anulá e evento aki luna pasá, Minister di Desaroyo Ekonómiko, Sr Eugene Rhuggenaath a tuma akshon i a mobilisá CTDF. E evento aki ta trese miónes pa nos isla, pero e gastu i rísiko finansiero tabata enorme pa Fundashon Bon Intenshon. Den korto tempu a yega na un akuerdo i asina garantisá e kontinuidat di e evento te en todo kaso 2022.

Luna pasá ora no tabata por a kontratá artistanan prinsipal, paso nan no tabata riba gira durante e periodo di CNSJ, Fundashon Bon Intenshon i Mojo Concerts a disidí pa salta un aña.

Awor a disidí pa tòg sigui e aña aki, Fundashon Bon Intenshon lo hasi su máksimo esfuerso, pa sigurá un par di nòmber grandi pa e edishon di 2017.

 

LAGA UN KOMENTARIO

Please enter your comment!
Please enter your name here