LOS ANGELES, USA (AFP).- Ekiponan di reskate ayera a sigui buska kurpanan den e barionan di Los Angeles na momentu ku tin pronóstiko di bientunan fuerte ku ta menasá na bolbe duna bida na e kandelanan, ku un balansa di 24 morto.

Riba e di shete dje katástrofe, ku a kima komunidatnan kompleto den e di dos siudat di mas grandi di Merka, a kuminsá vislumbrá e promé movishonnan di bida normal, apesar ku mas ku 90.000 persona ketu bai ta evakuá. Algun skol a bolbe habri nan portanan miéntras ku e ekiponan di basketbòl dje siudat, Laker i Clipper, a anunsiá di ta bai bèk den kompetensia.

Pero ku e indikashon ku e bientunan fuerte di Santa Ana lo ta bèk awe, outoridatnan a skohe pa prepará pa retonan nobo.

“Servisio Meteorológiko Nashonal (NWS) a pronostiká bientunan di orkan i p’esei nos ta hasiendo e preparashonnan nesesario”, segun e alkalde di Los Angeles, Karen Bass. Bientunan di te ku 110 kilometer pa ora ta suponé di trese “situashon hopi peligroso” for di e promé oranan di awe, segun Rose Schoenfeld di NWS.

E fiskal di distrito di Los Angeles, Nathan Hochman, a informá ku ta e intenshon pa anunsiá e promé akusashon relashoná ku e katastròf. “Mi ta trahando ku mas di 750 fiskal athunto i ku henter e komunidat polisial pa hiba na hustisia e personanan ei, kendenan ta despresiabel i un bèrgwensa”, el a bisa.

E shèrif di Los Angeles, Robert Luna, a konfirmá ku ekiponan ku kachónan entrená ta buskando kadavernan i ta pasa di kas pa kas den e zonanan afektá pa e kandela.

“Ta un trabou bastante fèrfelu i pa desgrasia, kada dia ku nos ta hasiendo esaki, nos ta topa ku restonan mortal”, segun el a bisa.

Mientrastantu, kasi 9.700 hèktar a keda destruí pa e kandela.

LAGA UN KOMENTARIO

Please enter your comment!
Please enter your name here