PORT AU PRINCE, AP.- E tasa di mortalidat di un epidemia di kólera ku a mata mas di 7 mil persona na Haiti a kuminsá baha, pero e debate rondó di e kousanan di e epidemia no ta duna siñal disminushon.
Bentando gasolin riba e kandela, un estudio di un eksperto renombrá di kólera di e universidat di Maryland a bisa ku na Haiti tin un di dos stam di e malesa ku a pasa inatvertí na e yegada di un batayon di forsa di pas di Nashonnan Uni prosedente di Nepal. Hopi ta kulpa e batayon ei pa e brote ku a infektá mas di mei mion persona.
E estudio no ta atribuí e epidemia na e stam di kólera nobo pero ta bisa ku e tabatin influensia.
Esei tabata sufisiente pa a rebibá diskushonnan i alimentá e tenshonnan polítiko rondó di esei pa sa si kólera a keda trese pa e sernan humano òf generá pa medio ambiente.
E outor di e informe, Rita Colwell, eks direktora di e Fundashon Nashonal di Siensia di Merka, a bisa ku e no a tuma parti den e debate. Pero su estudio, publiká den e revista Proceedings Of The National Academy Of Sciences, ta kuestioná e tésis di Nashonnan Uni komo responsabel di e brote.
E informe ta señalá ku un serie di sirkunstansha ambiental a pèrmití pa e bakteria aparesé den 2010, kaminda Haiti keda asotá pa un teremoto, un orkan i un verano hopi kalor.
Poko dia despues di e teremoto grandi, for di ‘nowhere’ e kólera a surgi, den un pais ku no tabatin ningun antesedente di e malesa ei, segun investigashonnan di Duke University.
