KUMAMOTO, HAPON, AFP.- Ekiponan di reskate tabata buskando posibel sobrebibientenan entre ruina di un sentro komersial na Hapon. Un temblor fuerte a laga por lo ménos 13 morto.
Un gran eksploshon a destruí un parti di e sentro komersial 50 minüt despues ku a registrá e temblor di 7,1 djamars den region di Kumamoto. Un temblor na aña 2016 a laga kasi 300 morto.
E temblor a laga dañonan grave riba e isla di Kyushi. Esaki a destruí vários kas i provoká kandelanan i laga míles di persona sin awa i koriente.
Desde e temblor prinsipal a registrá vários repliká den e zona.
E presidente di e empresa ku ta manehá e sentro komersial Aeon a bisa ku tres persona a muri na e sitio. Ainda tin algun pèrdí. “Ainda ta investigando kousa di e eksploshon pero probablemente ta debí na un eskape di gas”.
Vários persona mas a muri den otro partinan di Hapon. E bosero di gobièrnu, Minrou Kihara, a bisa ku te ku djárason mainta mas di 9.000 persona a buska refugio den tres region di e isla Kyushu.
