SUTATAUSA, COLOMBIA, AFP.- Miembronan di ekiponan di reskate tabata hasiendo nan máksimo esfuerso djárason pa salba dies minero pegá den un mina di karbon den sentro di Colombia despues di un eksploshon ku a laga por lo ménos 11 morto.
Miembronan di famia a warda dilanti di e mina, desesperá pa haña mas notisia di nan sernan kerí.
“Nos ta hasiendo tur esfuerso ku gobièrnu regional di Cundinamarka pa reskatá esnan pegá na bida”, asina presidente Gustavo Petro a bisa kende a ofresé un “brasa solidario na e víktimanan i nan famianan”.
E agensia nashonal di mina ANM, a publiká riba Twitter djárason mainta ku a reskatá dos trahadó na Sutatausa.
Gobernador Nicolas Garcia di departamento di Cundinamarca a bisa na Blu Radio ku mas ku 100 persona ta involukrá den e búskeda di dies minero pèrdí, ku a keda pegá 900 meter bou di tera.
E eksploshon a sosodé den un mina di karbon legal konektá bou di tera ku sinku mas.
Colombia a registrá mas ku 1.260 aksidente minero desde 2011 te ku mei 2022, ku un promedio anual di 103 morto, segun datonan ofisial.
