…Maria Corina Machado ta mira kon un di su luchadónan mas ta muri den prizòn na Venezuela…
CARACAS (AFP).- E kabesante di oposishon di Venezuela, Maria Corina Machado, ayera a denunsiá e morto den prizòn di un dirigente ku a keda detené den e krísis despues di elekshon, pa motibu dje re-elekshon kuestioná di e presidente iskierdista Nicolas Maduro. Ku esaki ta suma na kuater e kantidat di prezunan morto for di novèmber último. Outoridatnan te ku ayera nochi no a hasi un deklarashon.
“E régimen a asesin’é” den prizòn, segun e lider opositor María Corina Machado riba X, refiriendo na Reinaldo Araujo, un militante di su partido, Vente Venezuela, di e estado Trujillo.
Araujo a keda detené dia 9 di yanüari, na víspera dje huramentashon di Maduro pa un mandato nobo. “E tabatin problema serio di salú, pero a neng’é asistensia médiko. Esei te ku dia di awe, ora ku a resultá ku ta muchu lat”, segun el a skibi.
E proklamashon di Maduro pa un di tres mandato konsekutivo (2025 – 2031) a sòru pa protestanan ku a laga 28 morto i 2.400 detenshon, di kua 1.900 despues por a sali for di prizòn. Aktivistanan ta ketu bai ta arestando opositornan.
Dia 14 di novèmber último Jesus Manuel Martinez, di 36 aña i kende tambe tabata di e partido di Machado, a fayesé.
Dos otro detenido, Jesús Rafael Álvarez, di 44 aña i Alexander González Pérez, di 43, a muri algun dia tras di otro den desèmber di 2024 den e prizòn di seguridat máksimo na
Tocuyito, Carabobo.
For di 2014 por lo ménos un dozein di “prezunan polítiko” a muri estando bou di kustodia di estado, segun aktivistanan di derechinan humano.
