Un dje opositornan fuerte di Maduro, Juan Pablo Guanipa, kende apénas algun ora despues di a sali for di prizòn a keda reportá komo pèrdí.
CARACAS (AFP).- E ganadó di Premio Nobel di Pas, Maria Corina Machado, ayera a denunsiá e “sekuestro” na Venezuela di un estrecho aliado opositor, Juan Pablo Guanipa (561) kende tabata den prizòn kasi nuebe luna akusá di konspirashon. Djadumingu último el a sali for di prizòn, pero ya ayera no tabata sa su paradero. Ministerio Públiko a duna di konosé ku e opositor a violá su libertat kondishonal i a pidi pa e keda demente. Pero oposishon i su famia ta denunsiá “desaparishon fòrsá” na man di hòmbernan fuertemente armá.
“Esaki ta proba un biaha mas ku no solamente nos ta enfrentá un régimen kriminal, sino un régimen ku tin miedu di bèrdat, ku ta teme e siudadanonan”, segun Machado na periodistanan na Washington.
Guanipa a dediká su poko oranan di libertat pa bishitá famianan di prezunan polítiko, tambe el a rekoré Caracas den un karavana di bròmer i a pidi pa tene elekshonnan nobo.
Ministerio públiko a argumentá ku Guanipa a violá e puntonan akordá pa e por a sali for di prizòn. “Pero e ta sali i ta deklará i menasá”, segun e fiskal general TarekWilliam Saab. “El a violá un dje medidanan ku ta bisa ku e no por hasi deklarashon”.
Di su parti, e poderoso minister di interior, Diosdado Cabello, a kritiká e loke el a kalifiká komo “estupides di algun polítiko”, sin hasi referensia dirèkt na Guanipa.
