PUNTA ARENAS, CHILE, AP.- E minister di Defensa chileno a informá djaweps ku a deskubrí restunan humano i tambe di e avion militar pèrdí. E deskubrimentu a keda hasi riba e region tormentoso Paso Drake, kaminda e avion ku 38 persona a disparsé.
E minister Alberti Espina a konsiderá ku e 38 okupantenan di e Hercules C-130 no a sobrebibí. El a agregá ku ta e pais su deber pa haña e kompatriotanan pèrdí, i 48 ora despues a haña restunan di e avion.
E hefe komandante di Forsa Aéreo Chile (FACH), general Arturo Merino a bisa ku “a haña restunan humano huntu ku restu di e avion kual probablemente ta parti i e pasaheronan”. El a agregá ku ta “praktikamente imposibel ku tin sobrebibiente”.
Aparte di e restunan humano, a haña algun pertenensia personal segun indikashon di e komandante di Kombate di FACH, general Cristian Pizarro. E deskubrimentu tabata 30 kilometer leu di e sitio kaminda e registrá kontakto ku e avion pa último biaha.
Espina a gradisí e yudansa internashonal importante ku a yuda haña e avion aksidentá i a afirmá su disposishon pa kolaborá ku Fiskal pa determiná kiko a pasa ku e avion.
E Hercules C-130 no a duna ningun aviso di problema tékniko òf di klima promé ku su kaida. A kuminsá trasladá famia di e víktimanan desde e base aéreo Cerrillos pa Punta Arenas.
