Ta destituí fiskal guatemalteko ku a purba anulá elekshon

LEONOR MORALES; fiskal guatemalteko kende a keda destituí.

CIUDAD DE GUATEMALA (AFP).- Ministerio públiko di Guatemala ayera a destituí un funshonario haltu ku a purba na anulá e elekshonnan di 2023 den kua e aktual presidente sosial demokrat Bernardo Arévalo a resultá e ganadó. E fiskal Leonor Morales den desèmber di 2023 a duna di konosé ku e elekshon selebrá kuater luna promé tabata “nulo” debí na “kosnan robes” i den un akto a hasi yamada riba wesnan elektoral pa laga e resultado sin efekto.
Morales tabata e hefe di un unidat di delitonan kontra di funshonarionan hudisial i sindikalistanan. Arévalo a denunsiá su yamada komo un intento di “gòlpi di estado” dirigí pa e fiskal general dje tempu ei, Consuelo Porras, sanshoná pa Merka i Union Europeo, ku a tild’é di ta : “korupto” i “anti demokrátiko”.
Segun e mandatario, Porras ker a evitá ku e ta asumí presidensia pa su promesa di ataká e delitonan di korupshon. E fiskal a keda sustituí pa Gabriel Garcia Luna, kende e siman aki a anunsiá salida di shete funshonario, inkluso Morales.
Poko dia despues di a asumí e funshon, Garcia Luna, designá pa Arévalo, a distituí e fiskal Rafael Curruchiche, man drechi di Porras i kende a enkabesá investigashon kontra di periodistanan, eks-fiskalnan i eks-wesnan antikorupshon, algun di nan awor den eksilio. Porra a laga e puesto despues di ocho aña di frakaso den reelekshon i den su intentonan pa bira wes den e máksimo korte di hustisia dje pais.