Ta e mihó ehèmpel pa bo mes

Noëlgel Pinedo a presentá su buki ‘Algu pa mi Tera’. E buki ta un tomo di poesia skirbí pa e poeta/eskritor: Noëlgel Pinedo, ku diferente tema interesante. Noëlgel ta un hóben yu di Kòrsou di 20 aña i el a skirbi e buki aki na edat di 18 aña. Noëlgel a kaba VSBO, sektor di Ekonomia i awor e ta studia ‘Artiestenopleiding’ na Theaterschool Rotterdam, Hulanda. Aparte di eskritor/poeta, Noëlgel ta aktor, kompositor i eskritor di kansion. I Noëlgel a duna algu di su mes pa nos por kompartí den Djasabra.

Skibi for di grupo 7

Noëlgel a kuminsá skibi ora e tabata den klas 5 esta grupo 7. Despues di einan ora el a pasa over pa enseñansa sekundario el a keda den e sirkulo di skibimentu. Na 4 okashon el a partisipá na Arte di Palabra. Den su partisipashonnan entre otro e tabatin su propio poesianan ku el a presentá na e públiko. Na dos okashon el a sali den e finalistanan. Siendo na St. Joseph VSBO el a haña mas guia ainda i einan el a haña enkurashamentu pa entre otro subi tarima, para MC i e interes tabata aun mas grandi pa loke ta literatura i ekspresá algu na e públiko. Na St. Joseph tambe el a partisipá na arte di palabra kaminda na un okashon el a sali den e finalistanan. I dado momentu el a sinti ku a yega e ora pa e hasi algu pa e resaltá un poko mas. Noëlgel tabata na punto di bai eksterior i teniendo na kuenta ku 7 aña largu el a skibi kuenta i poesia, el a disidí di di kue 56 di su mihó obranan. Huntu ku Diana Lebacs i Caterine Bruneti nan a kontrolá nan, pa asina pro presentá un buki di poesia ku bunita ilustrashon i ku a keda presentá na públiko na 2017.


Komplasé sosiedat no mas

Ora Noëlgel a yega Ulanda pa su estudio, e tabata hasiendo algu ku e no tabata sintié ful ful kómodo den dje i a stòp ku esaki i a tuma e rísiko pa hasi oudishon den temporada di eksámen. Su promé estudio tabata algu den merkadeo pasobra el a pensa ku komo artista e kier a hasi algu ku e por merkadeá su mes i hinka su mes mas leu. Pero esei tabata parti di loke semper el a bin ta tende, esta ku sosiedat ta pidi pa bo tin un diploma en bes di bai hasi algu den arte. I den e di dos periodo el a disidí ku ta basta komplasé sosiedat i a bai hasi pa su mes. El a bai hasi oudishon pa skol di teatro. I asina el a keda aseptá den grupo di mas di 200 mucha di kual 30 so aseptá. Esei ta nifiká ku bo mester tin konosementu di loke bo ta hasi i habrí pa nan traha riba bo. Bo por ta malu den kantamentu i skibimentu pero si nan mira ku bo tin interes nan por yuda bu ku algu pa bo krese. I esei ta loke a sosodé ku Noëlgel ku awor ta bayendo su di dos aña den e studio aki.


Inspirashon

Algu pa Mi tera ta 2 tomo den un buki. El a sòru pa e 56 poesianan ta parti den e mesun ekivalensia di poder pa un no ta mas suak ku otro. I pa loke ta e inspirashon pa a yega na e poesianan ei, Noëlgel a dal un bon hari den su entrevista. El a bisa ku durante di 7 aña el a skibi kosnan ku el a pasa aden i ku nunka e tabatin e kurashi di bisa un hende. Ta kartanan ku e mes a skibi, ta kosnan privá ku el a kue hasi públiko. I ta hopi kurashi e tabatin pa hasié. I ora lesa nan ta trata aki di eksperensianan. E buki tin 5 tema kual ta amor, Kòrsou,  idiologia, alegria i gradesimentu kaminda e ta yama danki, i kosnan nèchi formá ta eksperensianan di bida ku el a kue. E no a bai hasi niun klase di estudio i no buska nada riba Internet pero ta kosnan puru di su kurason. Ta un eksperensia di un hóben di 18 aña huntu ku un otro di 16 aña a hasi, puru amor pa arte.

 

Mi Karta

Riba nos pregunta kua ta e poesianan aki e ta gusta mas, Noëlgel a bisa ku e no tin un faborito pero tur e ta gusta. Pero el a lesa un pa nos di Djasabra MI KARTA…..

E palabranan di e poesia aki ta masha fuerte. Fuerte pa un hóben di 18 aña e tempu ei. Noëlgel ta konsiente ku e tin un vokabulario hopi amplio ounke e ke pa esaki ta mas amplio ainda. I esaki a ta yega na dje debí na e interes ku e tin den nos lenga materno. I e ta spera ku aki algun aña e por tin un buki mas di kuenta i poesia.

 

Estudio di artista na Rotterdam

Pa loke ta su estudio, e ta den direkshon di artiesten opleiding na e skol di teatro na Rotterdam. E ke yega na dirigí su mes obra di teatro, asina Noëlgel a bisa Djasabra. Su deseo ta pa e ta dosente di arte pa asina e por sigui pasa su konosementu over. Aparte di esei e ta skibi kantika i e ta kanta. Ounke e ta skibi mas kansion i e ta skibi diferente obra i kuenta mas.

 

Oportunidat

Noëlgel ta kere ku na Kòrsou e oportunidatnan tabat’ei pa e sigui ekspandé su mes pero konosiendo su forma di pensa grandi, un podio chikí no ta pe. “Nos tin hopi hende ku ta enkantá ku arte pero nos tin di siña refiná nos arte pa trese  e balor na e arte i no keda na solamente un komedia òf djis hasi un bòmbòshi. Na e skol kaminda mi ta nan ta stima kon mi ta inkulká nos idioma papiamentu den kosnan di ulandes i den mi presentashonnan. I si nan ta interesá na Ulanda e ta nifiká ku e turista ku ta bin aki tambe ta interesá”, Noëlgel a enfatisá.

Logra hopi

E ta kere ku aki na Kòrsou mester kuminsá for di na skol. Tin dosente di arte pero nan no ta sufisiente i ta un lástima ku e interes tampoko no ta serka nos hóbennan. Tin hopi hóben sintá kantu di kaya òf hóbennan ku no tin nada di hasi, tin interes. Pero si no tin hende pa push nan, nan lo no yega niun kaminda. Noëlgel ta kere ku mester stòp di bisa ku bo no ta logra nada ku arte, Bo ta logra hopi ku arte pasobra aki tin e potensial pa hasié.

 

Ta e mihó ehèmpel pa bo mes

Noëlgel no ke ta un inspirashon pa otronan pero e ke ta e mihó pa su mes. Bon persona pa su mes i si otro hóbennan ta mira loke e ta hasi i ke hasié nan por dal bai. Pero e no ta esun pa bisa niun unda pa nan bai pasobra hopi biaha esnan ku ke ta un bon ehèmpel i ta bisa di ta un un bon ehèmpel, si wak mas atras por mira ku realmente e persona ei no ta asina. “ta e mihó ehèmpel pa bo mes”, segun Noëlgel.

Pa loke ta spònser pa su buki el a konta ku el a kana hopi pa haña spònser i ku e ta gradesí na nan. Tur esaki ta mustra ku ainda e sosten pa arte tei. E kaminda no tabata fásil pero difísil tampoko e no tabata. “Nan a mira ku tabata un hóben pushando padilanti den un situashon ekonómiko ku no ta basta stabil”. Noëlgel a enfatisá.

 

Internashonalisá…..

Noëlgel no ta skibiendo mashá na papiamentu pero awor aki e ta internashonalisando su bukinan. I esei lo hasi su produkshonnan mas riku. Lo por bai tende su kantikanan tambe i tur ta di su propio inspirashon.

 

Mi ta spera ku hóbennan lanta kabes. No solamente puntra pero hasi e preguntanan i pone tur plan riba papel i despues di un par di aña wak bèk kuantu bo a logra. E bukinan di Noëlgel ta optenibel na Boekhandel Mensing.

 

SHARE

LEAVE A REPLY