‘Ta importante pa informá turistanan tokante nos bòrchi di tráfiko!’

633

WILLEMSTAD.- Segun Riglène Cristina, presidente di Asosashon Tráfiko Sigur Kòrsou (ATSK), ta remarkabel ke e aña aki basta estranhero ta enbolbí den aksidente di tráfiko riba nos isla. Cristina ta reakshoná riba un artíkulo ku a sali den EXTRA resientemente tokante e kantidat grandi di turista ku ta enbolbí den aksidente na Kòrsou. Manera ta konosí te ainda den total 11 persona a pèrdè nan bida den un aksidente e aña aki, tres di nan ta hende ku tabata bishitando Kòrsou.
Durante un aksidente di tráfiko ku a tuma lugá djadumingu 13 mart di e aña aki riba Dominico “Don” Martina Boulevard (Nieuwehaven) un di e dos persona ku a fayesé ta un turista. Ta trata di un aksidente di outo ku a tuma lugá entre dos vehíkulo kaminda 5 persona a resultá herida. Dos di nan, un dama turista i un shofùr lokal, a pèrdè nan bida. Tres turista a keda transportá pa deportamentu di emergensia di CMC pa tratamentu médiko avansá.
Riba e mesun dia un hóben motosiklista for di Hulanda, personal di defensa, a fayesé durante un aksidente riba Julianabrug. E dies víktima di aksidente den tráfiko na Kòrsou di e aña aki, ku a tuma lugá djaluna 18 di Aprel, tambe ta un turista. E aksidente di tráfiko a tuma lugá na Edisonstraat. Cristina ta splika ku turistanan, promé ku nan ta subi nos kaya, nan tin ku siña nos tipo di kaya, nos reglanan di tráfiko i bòrchinan di tráfiko. ‘Ku no tur bia ta similar ku den nan pais.’
Cristina ta bisa ku dos aña pasa, relashoná ku eksistensia di 70 aña di ATSK a lanta e idea pa aserká ‘car rentals’ pa duna nan foyeto di e diferente bòrchi di tráfiko ku ta eksistí na Kòrsou. Pa asina turistanan sa kua bòrchi di tráfiko ta na Kòrsou. Debí na periodo di Covid e proyekto no por a sigui, pero segun Cristina intenshon di ATSK ta pa sigui ku e proyekto pa informá turistanan tokante nos reglanan i bòrchinan di tráfiko. E ta splika ku tin bia ku turistanan ta interpretá nos bòrchinan di tráfiko na un manera ku no ta adekuá.
Un bòrchi ku segun e presidente turistanan kontinuamente ta brua den dje ta e bòrchi di ‘No U-Turn’. Por ehèmpel na Merka òf Colombia e bòrchi ta bisa ku bo por hasi U-Turn. Cristina: ‘Esaki ta nifiká ku turistanan no sa kiko nos bòrchi ta nifiká i nan ta hasi e kontrario. P’esei ta importante pa informá nan tokante nos bòrchinan.’

PORTRET
Riglène Cristina, presidente di Asosashon Tráfiko Sigur Kòrsou (ATSK).

LAGA UN KOMENTARIO

Please enter your comment!
Please enter your name here