CARACAS, AP.- E Fiskal General di Venezuela a start ku un investigashon nobo kontra e lider opositor Juan Guaidó, pa supuesto vínkulo ku un organisashon kolombiano delinkuente.
E fiskal General, Tarek William Saab a bisa ku a disidí pa inisiá e proseso kontra Guaidó pa supuesto relashon ku “Los Rastrojos”, un grupo kalifiká komo “narkoparamilitar” despues ku a divulgá potrètnan kaminda e ta paresé huntu ku dos miembro di e organisashon aki.
“No ta trata di un simpel potrèt”, asina Saab a bisa despues ku el a hustifiká inisio di e proseso. Pa e funshonario, ta trata di “evidensia fuerte”.
E minister di Interior, mayor general Nestor Revrol, a bisa ku e gobièrnu lo duna Ministerio Públiko un serie di prueba pa prosesá e opositor akusá di tin “vínkulo direkto” ku e lidernan di Rastrojos, señalá di a partisipá den aktividatnan di narkotráfiko, kontrabanda di kombustibel, asesinato i reklutamentu di menornan.
Revrol a afirmá ku Guaidó “a wòrdu risibí pa e organisashonnan narko paramilitar kolombiano” aki den febrüari despues ku el a pasa na frontera i mustra algun potrèt di e opositor huntu ku paramilitarnan.
Guaidó a kibra su silensio djabièrnè i bisa ku “ta difísil pa sa ta ken kier a saka potrèt ku mi”. El a indiká ku “ta difísil pa diskriminá kontra esun ku pidi un potrèt”.
