Riba e potrèt por mira e dos personanan detené pa militarnan kolombiano den un kas na Bogotá usá komo depósito di eksplosivonan.
BOGOTA, Colombia (AFP).- Outoridatnan di Colombia a deskubrí un depósito di gueria ELN na Bogotá, destiná pa fabriká eksplosivonan. E meta, aparentemente, ta pa realisá akshonnan terorista durante elekshon, segun e Minister di Defensa, Pedro Sanchez.
Ehérsito di Liberashon Nashonal (ELN) e siman aki a anunsiá di forma unilateral ku ta para ku nan aktividatnan pa motibu di elekshon parlamentario i presidensial, ku ya ta marká pa preshon di gruponan armá i e asesinato den 2025 dje senador i aspirante presidensial Miguel Uribe.
E elekshon parlamentario ta dia 8 di mart i esun presidensial dia 3 di mei.
E artefaktonan aki por a keda destiná pa akshonnan terorista durante e dia di elekshon”, segun e minister riba ret sosial X, den un publikashon ku el a inkluí potrètnan dje arma- i munishonnan konfiská. Outoridatnan a pone man riba dos persona durante e razia den zùit di Bogotá, den kua a tuma parti gruponan di élite ku a kibra un porta di metal di un kas kaminda tabatin e depósito. E operashon a keda realisá huntu ku ehérsito i polis, den kolaborashon ku e Atministrashon pa Kontrol di Droga (DEA) di Merka, segun e mandatario, kende a señalá ku e plan di ELN tabata pa realisá un atentado konta di elekshonnan.
Durante dje periodo pre-elektoral a registrá 457 menasa di morto kontra di lidernan sosial i polítiko. Kasi un tersera parti dje teritorio di Colombia ta bou di riesgo di violensia durante periodo di elekshon, segun Mishon di Opservashon Elektoral (MOA), un organisashon sivil kolombiano.
