…Potrètnan dje periodistanan hulandes asesiná pa militarnan salvadoreño den 1982…
SAN SALVADOR (AFP).- Korte Supremo di Merka lo pidi Merka e ekstradishon dje koronel Mario Reyes Mena, pa su supuesto responsabilidat den asesinato di kuater periodista hulandes den 1982.
Dia 17 di mart di 1982, e periodistanan Koos Jacobus Andries Koster, Jan Cornelius Kuiper Joop, Hans Lodewijk ter Laag i Johannes Jan Willemsen a muri den un trampa armá pa militarnan den un área dje munisipio di Santa Rita.
“Segun e informe ku a yega serka mi, Korte den votashon a disidí pa hasi e solisitut di ekstradishon i esaki a keda aprobá”, segun e abogado Pedro Cruz, ku ta representá famianan dje víktimanan.
Reyes, kende awor tin 85 aña, ta biba na Virginia, den ost di Merka. Na momentu dje asesinatonan e tabata komandante di Cuarta Brigada de Infanteria di ehérsito na Chalatenango,.
E periodistanan tabata traha un dokumental na El Salvador pa reflehá e kontraste dje manera di biba entre un famia di kapital i otro den pueblonan den zona di konflikto.
Den 1993 un informe di Komishon di Bèrdat, kreá pa Nashonnan Uni, a konkluí ku e morto dje hulandesnan “tabata konsekuensia di un trampa harmá kontr’é nan” di parti di koronel Reyes ku “konosementu di otro ofisialnan”.
Pa e mesun kaso a prosesá e eks-minister di defensa, general José Guillermo
García (91 aña) i e koronel Francisco Morán (93). Tur dos ta den un hospital privá na e kapital salvadoreño bou vigilansia polisial.
E kaso aki a keda konhelá den 1993 pa un Lei di Amnistia ku a pordoná krímennan di guera. Pero den 2016 hustisia a deklará e norma ei komo no konstitushonal i komo tal riba 13 di mart 2018 a habri e kaso bèk.
E guera sivil (1980-1992) den e pais a laga mas di 75.000 morto i 7.000 hende kendenan a disparsé.
